بشام سیزن اٹی گمانی نوکاپ ناحالیت و گڑتی تیان بچنگ کن جم روڈ میپ اس جوڑ کننگے،وزیراعظم شہبازشریف
موسمی بدلی تا قومی کہول آ مون تروک گڑتی تتون مون تننگ کن بنجائی و صوبائی کہول آ بھرمی و جم کمکاری المی ءِ
Get real time updates directly on you device, subscribe now.
وزیراعظم محمد شہباز شریف پارینے کہ مستین نا آزمودہ غاتا رِد اٹ دا سال بشام نا سیزن ٹی گمانی نوکاپ نا حالیت و گڑتی تیان بچنگ کن گام گیج آتے اسہ جم ءُ روڈ میپ اسے نا رِد اٹ شین تننگے۔ کل صوبہ غاک ہندی کہول آ گڑتی تتون مون تروک ضلع غاتیٹی دریاب نا کسر و نوکاپ نا گمانی کسر تیٹی ناروا ودی کاری و ایلو ویل آتا پیشگی و بھرمی ایسر اس پک کیر۔ وزیراعظم محمد شہباز شریف نا کماشی ٹی بشام سیزن نا پیشگی تیاری و موسمیاتی بدلی و چاگڑدی گڑتی تیان بچنگ نا نظام آ جاچ دیوان اڈ ہلک۔ وزیراعظم پارے کہ پاکستان موسمیاتی بدلی تا خراب زہم تیان زہمی مروک آ ملک آتیٹی اوار ءِ۔ موسمی بدلی نا قومی کہول انا گڑتی تتون مون تننگ کن بنجائی و صوبائی کہول آ بھرمی و جم کمک المی ءِ۔ وزیراعظم خاص پارت کرے کہ بنجائی وزیر موسمیاتی بدلی و چیئرمین نیشنل ڈیزائسٹر مینجمنٹ اتھارٹی (این ڈی ایم اے) کل صوبہ، آزاد کشمیر و گلگت بلتستان نا ہندا ہفتہ ٹی ہلہلہ ئی دورہ ءِ کیرہ تانکہ بشام نا پیشگی تیاری تے پورو کننگ مرے۔ بنجائی وزیر ڈٹ بندی نا چاروکی ٹی این ڈی ایم اے و ایلو بنجائی وزارت آتیا تالان ہلہلہ ئی رسپانس کمیٹی ٹہیفنگک ہرا صوبائی تعلقدار ادارہ غاتتون عملی کمک کن کاریم کے۔ ہلہلہ ئی رسپانس کمیٹی ہفتہ ٹی اِرا دیوان اڈ ایتک۔ وزیراعظم پارت کرے کہ ہلہلہ ئی رسپانس کمیٹی ٹی بنجائی وزیر خزانہ بشام نا گمانی بھسکاری نا حالیت اٹی ہلہلہ ئی فنڈ انا ٹہیفنگ کن پیشگی تیاری پورو کے۔ درملکی ادارہ غاتا مالی کمک نا رِد اٹ ڈٹ آک ہم قومی و ہندی ادارہ غاتا واکداری ءِ ودفنگ کن کاریم اٹ اتنگر۔ شہباز شریف پارے کہ قومی آبی رکھ و سلامتی کن بنجائی حکومت دا سال مالی بجٹ اٹی آبی ڈٹ آتا زُوت پورو کننگ کن 330 ارب روپئی نا ودکی کچ اس جتا کرینے۔ مستین نا آزمودہ غاتا رِد اٹ دا سال بشام سیزن اٹی گمانی نوکاپ نا حالیت و گڑتی تیان بچنگ کن گام گیج تے اسہ جم ءُ روڈ میپ اسے نا رِد اٹ شین تننگے۔ وزیراعظم پارے کہ کل صوبہ غاک ہندی کہول آ گڑتی تتون مون تروک آ ضلع غاتیٹی دریاب نا کسر و نوکاپ نا گمانی کسر تیٹی ناروا ودی کاری و ایلو ویل آتا پیشگی و بھرمی ایسر اس پک کیر۔ بشام نا وخت آ کل ادارہ غاک تینا مچ آ فنی و انتظامی واکداری ءِ الس نا آسراتی کن کاریم اٹ اتیر۔ دیوان اٹی چیئرمین این ڈی ایم اے بشام نا پیشگی تیاری و گمانی پِر و نوکاپ نا حالیت و موسمی خرابی نا بابت بریفنگ تس و پاننگا کہ مچ آ دنیا ٹی دا سال ترند باسنی نا ریسہ و گمان آن چَپ موسمی بدلی تا گمان پیدوارءِ۔ پاکستان اٹی ہم بھاز باسنی و جولائی نا تُو اٹی گمان آن چَپ پِر تا گمان ارے ہرافتے کن سُج پام نا رِد اٹ کل درکار بست و بند آک کننگ انگ ءُ۔