کچ اٹنگا وسیلہ غاتیٹی ہم یونیورسٹی تے مونی دننگ اٹ سرسہب مسنن،جعفرخان مندوخیل

گورنر بلوچستان جعفر خان مندوخیل پارینے کہ تینا گچین ڈٹ بندی و سخت آ چاروکی نا سوب آن نن صوبہ نا کل پبلک سیکٹر یونیورسٹی تیٹی کچ اٹنگا وسیلہ غا و بے کچ آ ویل آتا نیام اٹی بریبری کننگ اٹی سرسہب مسنن۔ اینو گوادر یونیورسٹی کن 88.79 درسد نا سکور دوئی کننگ نن کل اکن اسہ شرفمندی اسے ہراڑکن یونیورسٹی آف گوادر نا وائس چانسلر پروفیسر ڈاکٹر عبدالرزاق صابر و اونا مچ آ ٹیم ستا کڑزک۔ دا خیال آتا درشانی ءِ او یونیورسٹی آف گوادر نا مسٹمیکو سینیٹ دیوان نا کماشی ءِ کرسا کرے۔ دیوان اٹی وائس چانسلر پروفیسر ڈاکٹر عبدالرزاق صابر، وائس چانسلر یونیورسٹی آف بلوچستان ڈاکٹر ظہور احمد بازئی، بلوچستان ہائی کورٹ نا جسٹس نجم الدین مینگل، ایڈیشنل سیکرٹری ہائر ایجوکیشن‘ پرنسپل سیکرٹری ٹو گورنر بلوچستان عبدالناصر دوتانی، پرو وائس چانسلر پروفیسر ڈاکٹر سید منظور احمد، رجسٹرار ڈاکٹر دولت خان و سینیٹ نا ایلو باسک آک ساڑی ئسر۔ سینیٹ دیوان نا شریدار آتتون ہیت و گپ کرسا گورنر بلوچستان جعفر خان مندوخیل پارے کہ حکومت ہائر ایجوکیشن نا شون اٹی بھلو استخواہی اس تخک۔ ننا مسخت یونیورسٹی آف گوادر ءِ دنیا نا جوان انگا کوسٹل بیلٹ یونیورسٹی تا لڑ اٹی اوار کننگ ءِ۔ گوادر یونیورسٹی نا اسٹریٹجک پلان 2026-30 اٹی بیرہ کوسٹل بیلٹ تون گنڈوک آ مضمون آک ہراٹی بلیو اکانومی، میرین سائنسز، فشریز، کوسٹل بیلٹ مینجمنٹ و چاگڑد اوار ءُ، شاغنگانو تانکہ اونا پجار مدام برجاسلے۔ نن گوادر یونیورسٹی ءِ مچ آ ڈیہہ انا جوان انگا کوسٹل بیلٹ یونیورسٹی جوڑ کننگ کن ایلو بشخ آتا چاہندار آتیان ہم کمک و راہشونی ہلنگ اٹی اُن۔ گورنر بلوچستان پارے کہ گوادر یونیورسٹی ٹی کوالٹی ایجوکیشن تون اوار ووکیشنل ٹریننگ و ڈپلومہ کورس آتا بنا بھاز گچین ءِ۔ نن دا ڈپلومہ کورس آتے خاص ءُ اہمیت اس ایتنہ انتئے کہ دا بے روزگار ورنا تیکن روزگار نا بھلو وارخواہی پک کیرہ۔