شیلٹر لیس تعلیمی ادارہ غاتا بحالی کن ہم گام گیج کننگ انگ ءِ،کمشنر کوئٹہ ڈویژن

کوئٹہ، کمشنر کوئٹہ ڈویژن ذیشان لاشاری نا کماشی ٹی کوئٹہ ڈویژن اٹی تعلیمی حالیت، اسکول آتا فعال مننگ، شونداری ڈٹ و تعلیمی آسراتی تا جاچ ءِ ہلنگ کن آن لائن دیوان اڈ ہلک۔ دیوان اٹی ڈپٹی کمشنر کوئٹہ مہراللہ بادینی، ڈپٹی کمشنر کوئٹہ ویسٹ منیر احمد درانی، ڈویژنل ڈائریکٹر محکمہ تعلیم میڈم روبینہ، ای ڈی او کوئٹہ ڈاکٹر نصیر علی شاہ آن لائن وخت اس کہ اسسٹنٹ کمشنر پولیٹیکل کوئٹہ ڈویژن سید کلیم اللہ و ایلو تعلقدار افسرآک بشخ ہلکر۔ دیوان اٹی ڈویژنل ڈائریکٹر محکمہ تعلیم نا کنڈ آن کمشنر کوئٹہ ڈویژن ءِ کوئٹہ ڈویژن اٹی تعلیم نا جم حالیت، اسکول آتا کچ، استاد و طالب علم آتا کچ‘ برجا شونداری ڈٹ، تعلیمی پروگرام و اسکول آتے مون تروک ویل آتا بابت جم بریفنگ تننگا۔ بریفنگ اٹی پاننگا کہ کوئٹہ ٹی جم وڑ اٹ 667 اسکول آتیٹی 9 ہزار 830 استاد خذمت سر تننگ اٹی ءُ، وخت اس کہ دا تعلیمی ادارہ غاتیٹی 2 لاکھ 17 ہزار آن زیات طالب علم خواننگ اٹی ءُ۔ کوئٹہ ٹی 25 وخت اس کہ مستونگ اٹی 10 شونداری ڈٹ آتیا ترندی اٹ کاریم برجاءِ۔ دیوان ءِ مستی پاننگا کہ ورلڈ فوڈ پروگرام نا رد اٹ کوئٹہ ٹی پرائمری کلاس نا چناتے کنشت فراوان کننگ انگ ءِ، وخت اس کہ پرائمری اسکول آتیٹی چناتا داخلہ غاتیٹی ودکی کن ہم خصوصی گام گیج کننگ انگ ءِ‘ دیوان اٹی تعلیمی ادارہ غاتے مون تروک ویل آتیا ہم جم سجفنگا۔ بریفنگ نا رِد اٹ کوئٹہ ٹی 9 اسکول آتیا ودیکاری جوڑ ءُ، وخت اس کہ گاڈی تا مفننگ‘ تعلقدار افسر آتیکن ہنکین نا ویل، چوکیدار و خاکروب آتا کمتی نا سوب آن اسکول آتا سفائی و سیکورٹی نا رد اٹ مشکل مون تروک ءِ۔ کوئٹہ ڈویژن اٹی 155 اسکول نا غیر فعال مننگ نا نشاندہی ہم کننگاسس، ہرافتے فعال کننگ کن خصوصی چکار کننگ انگ ءِ۔ دیوان ءِ پاننگا کہ اسکول آتیٹی استاد آتا حاضری و کارکڑد نا چاروکی ہلنگ کن مانیٹرنگ نا نظام ءِ گچین کننگ انگ ءِ۔ دا وخت آ دا ہیت آ زور شاغنگا کہ پوسکن آ اسکول آتا تفنگ نا جاگہ غا گرج انا رِد اٹ ساڑی پرائمری اسکول آتے مڈل و ہائی اسکول تا کہول آ اپ گریڈ کننگے، تاکہ طالب علم آک پرائمری تعلیم پورو کننگ آن پد ہم تینا تعلیم ءِ برجا تخنگ کیر و اسکول ءِ النگ نا کچ اٹ کمتی اتنگ مرے۔ بریفنگ اٹی مستی پاننگا کہ شیلٹر لیس 34 اسکول و نوکاپ آن زہمی مروک تعلیمی ادارہ غاتا بحالی کن ہم گام گیج کننگ انگ ءِ‘ استاد آتا کمتی ءِ مر کننگ کن کنٹریکٹ آ ایس ایس ٹی تا بھرتی، مانیٹرنگ نا گچین نظام و اسکول آتیٹی بنداوی آسراتی تا فراوانی تون تعلقدار سلاہ تیا ہم سجفنگا۔ دا وخت آ کمشنر کوئٹہ ڈویژن ذیشان لاشاری پارت کرے کہ اسکول ءِ الوک چنا و ڈراپ آؤٹ نا کچ اٹ کمتی اتنگ کن جم و قابلِ عمل ڈٹ جوڑ کننگے تاکہ زیات آن زیات چناتے تعلیمی ادارہ غاتیٹی اتنگ مرے۔