صارف آتیان سرکاری نہاد آن زیات ہلنگ ءِ اسُل سگپنہ،اسرار احمد شاہوانی

ہرنائی، ضلع ہرنائی نا انتظامی وژن و السی آسودہی نا پرمان آتا رد اٹ ضلعی انتظامیہ پورو وڑ اٹ متحرک ءِ۔ دا رد اٹ اسسٹنٹ کمشنر خوست اسرار احمد شاہوانی خوست بازار نا اناگت و جم دورہ ءِ کرے۔ دا دورہ نا بنداوی مسخت بازار اٹی سرکاری نہاد آ عملدرآمد نا جاچ ءِ ہلنگ، ودیکاری تے چٹفنگ، ٹریفک نا روانی ءِ گچین جوڑ کننگ و سفائی نا جم حالیت آتا جاچ ہلنگ ئس۔ دورہ نا وخت آ اسسٹنٹ کمشنر خوست اسرار احمد شاہوانی بازار اٹی دکان، سوزی و میوہ غاتا ٹال، قصاب و جنرل اسٹور آتا دورہ ءِ کرے‘ او ہڑدے ئی کاریم نا گڑا، خاص وڑ اٹ سوزی، سو و لس کاریم نا گڑا تا نہاد آتے چیک کرے۔ اے سی خوست دکاندار آتے سخت پارت کرے کہ او حکومت نا کنڈ آن منظور و پک کروک سرکاری نہاد لڑ ءِ تینا دکان تیا پاش جاگہ غا خلیرو گڑاتے بیرہ پک کروک نہاد آتیا بہا کیر۔ صارف آتیان سرکاری نہاد آن زیات ہلنگ ءِ اسُل سگپنہ۔ ہرا دکان دار تینا خود آن کٹیا خوری یا سرکاری پرمان آتا خلاف ورزی آ خننگا اونا برخلاف سخت کانودی و تعزیراتی کارروائی کننگک۔ اسسٹنٹ کمشنر خوست اسرار احمد شاہوانی بازار اٹی شاری، گڑاک و پیرانگاتا ہن و بر اٹی آسانی ودی کننگ کن اہم شاہراہ و پیادہ چرینگ نا کسر تا جاچ ءِ ہلک۔ دکان دار آتے پارت کننگا کہ او دکان تا گڑا و ودی کاری تے کسر تیا تخپس تاکہ کسرک بند مفس۔ بازار اٹی گاڈی، موٹر سائیکل و پیادہ چرینوک آتیکن ٹریفک نا نظام ءِ گچین تخنگ کن جاگہ غا المی پرمان جاری کننگا۔ دورہ ناوخت آ بازار اٹ سَفائی و جانجوڑی نا اصول آتا ہم خوڑتی اٹ جاچ ءِ ہلنگا۔ بازار اٹی کھدکتر نا کشنگ و سفائی نا نظام ءِ گچین کننگ کن تعلقدار کارندہ غاتے پارت تننگا۔ دکان دار آتے ہم پابند کننگا کہ او تینا دکان تا مون آ سفائی نا خصوصی خیال تخر تاکہ الس ءِ اسہ سفا و دراخ جوڑ ءُ چاگڑد اس رسینگے۔ اسسٹنٹ کمشنر خوست پیدوار کرے کہ بازار اٹی السی آسودہی نا اصول تا و کانود آ عملدرآمد ءِ پک کننگ ضلعی انتظامیہ نا اولیکو اولیت اٹی اوار ءِ۔ دا وڑ انا اناگت دورہ غاک آخبت اٹی ہم باقاعدگی اٹ برجا سلرہ تاکہ الس ءِ کبینی، ناروا کٹیاکاری و بدانتظامی آن پورو رکھ فراوان کننگ مرے۔