نیب 190 ملین پاؤنڈ اسکینڈل، اعظم خان نا بیان ریکارڈ کرفنگا

اسلام آباد :  نیب اٹ 190 ملین پاؤنڈ اسکینڈل نا جاست پاست اٹ پیش رفت مسنے‘ مسکوہی پرنسپل سیکرٹری اعظم خان نیب اٹ پیش مرسا پی ٹی آئی نا چیئرمین نا برلاف بیان ریکارڈ رکفے‘ حوال نا رد اٹ قومی احتساب بیورو (نیب) انا کنڈآن 190 ملین پاؤنڈ اسکینڈل نا جاست پاست برجاءِ‘ مسکوہی وزیراعظم عمران خان نا پرنسپل سیکرٹری اعظم خان نیب راولپنڈی ٹی پیش مس‘ حوالی نا رد اٹ نیب اٹ پیشی نا وخت آ اعظم خان چیئرمین تحریک انصاف نا برخلاف بیان ریکارڈ کرفینے‘ یات سلے کہ نیب انا کنڈآن القادر ٹرسٹ نا رد اٹ 190 ملین پاؤنڈ اسکینڈل نا جاست پاست کننگ انگ ءِ‘ کیس اٹ چیئرمین تحریک انصاف عمران خان و اونا اُرائی بشریٰ بی بی ہم پندار ءِ‘و اوفتا برخلاف جاست پاست کننگ انگ ءِ‘ دا وخت آ اعظم خان نا نیب اٹ پیش مرسا بیان ریکارڈ کرفنگ ءِ جاست پاست اٹ بھلو پیش رفت اس گوندنگ انگ ءِ‘ یات سلے کہ 14 جولائی آ احتساب عدالت نا ایڈمنسٹریٹو جج محمد بشیر 190ملین پاؤنڈ القادر ٹرسٹ اسکینڈل نیب جاست پاست اٹ چیئرمین پی ٹی آئی و اونا اُرائی بشریٰ بی بی نا عبوری ضمانت ءِ ودیفیسس۔ 190 ملین پاؤنڈنا غیرکانودی گدریفنگ آ نیب انوسٹی گیشن اٹ چیئرمین پی ٹی آئی ورندی جمع کرفے ہراٹی پیشی کن وارخواہی خوااہنگا۔ 13 جولائی آ سماعت ناوخت آ خواجہ حارث ایڈووکیٹ عمران خان و اونا اُرائی بشریٰ بی بی نا حاضری آن استثنیٰ نا درخواست آتے دائر کرے۔ خواجہ حارث پاریسس کہ 9 مئی واقعہ غاتا کیہی کیسک ءُ ہرافتا سوب آن لاہور اٹ پیشی ءِ۔ عدالت پارے کہ چیئرمین پی ٹی آئی نا حاضری آن استثنیٰ نا درخواست ءِ نیب ءِ ہم تننگے۔ 17 جولائی آ چیئرمین پی ٹی آئی عمران خان ناکنڈآن نیب آ نوشتہ کروک چٹھی ٹی پاننگا کہ توشہ خانہ جاست پاست نا سوب آن نیب آفس اٹ پیش مننگ کپک‘ کنا جان ءِ خطرہ ءِ ہرانا سوب آن انکوائری رپورٹ ہلنگ کن نیب انا دفتر آ بننگ کپرہ۔ چیئرمین پی ٹی آئی مستی پارے کہ توشہ خانہ کیس انا انکوائری رپورٹ ءِ بیرسٹر گوہر خان دوئی کیک‘ چٹھی ٹی پاننگا کہ ای لاہور آن اسلام آباد آہن وبر کننگ کیوہ۔19 جولائی آ چندی عدالت آتے ٹی پیش مننگ کن اسلام آباد آ بریوہ‘ ہندا سوب آن توشہ خانہ جاست پاست نابابت پرسجو ٹی اوار مننگ نا تاریخ ءِ 19 جولائی پک کننگے۔

(آن لائن)