کور کمانڈر ہاؤس جلہو، جے آئی ٹی نا پرسجو پورو، عمران خان زموار گوندنگا

لاہور: جے آئی ٹی 9 مئی نا واقعہ غاتا جاست پاست ءِ پورو کرسا رپورٹ ءِ تیار کرے۔ جناح ہاؤس جلہو نا مقدمہ نمبر 96/23 اٹ چیئرمین پی ٹی آئی تون اوار پندار دوبہ دار آتے زموار گوندنگا۔ پولیس پرسجو ٹی پاننگانے کہ پندار دوبہ دار آتا جناح ہاؤس واقعہ ٹی ڈٹ بندی و عملدرآمد پک مسنے‘ جناح ہاؤس جلہو و 9 مئی ناایلو واقعہ غاک باقاعدہ ڈٹ بندی اٹ کننگار‘ جاست پاست ناوخت آ ڈیجیٹل شاہدی‘ موبائل ویڈیو، کلوزسرکٹ فوٹیج، موبائل رابطہ غاک پک مسر‘ رپورٹ نا رد اٹ چیئرمین پی ٹی آئی نا جے آئی ٹی نا مون آ تروک بیان شاہدی تیان چَپ ئس۔ جے آئی ٹی نا مون آ پیش مروک ایلو راہشونک تا بیانک ہم راستکی تیان چَپ پک مسر۔ پی ٹی آئی راہشون تا پیشن آن خواہفوک بندغ آتتون رابطہ غاک ہم موبائل کال ریکارڈ اٹ پک مسر۔ پی ٹی آئی راہشونک ڈیجیٹل و فرانزک شاہدی تا مون آ سوج آتا جوان ورندی ءِ تننگ کتوس۔ مقدمہ نمبر 96/23 تون اوار ایلو مقدمہ غاتے ٹی ہم پی ٹی آئی نا سرکڑدہ غاک زموار گوندنگار۔ دَہ مقدمہ ٹی پندار و دزگیر دوبہ دار آتا حساس ہند آتیا ساڑی گری جیوفینسنگ رپورٹ اٹ ک مس‘ کل مقدمہ غاتا پرسجوئی رپورٹ ءِ زوت عدالت اٹ پیش کننگک۔ یات سلے کہ دہشت گردی تون اوار 20 ٹک انا رد اٹ درج مقدمہ غاتے ٹی چیئرمین پی ٹی آئی، شاہ محمود قریشی، حماد اظہر، مراد سعید، علی امین گنڈا پور پندار دوبہ دار ءُ۔

(مانیٹرنگ ڈیسک)