کوئٹہ دھماکہ، 2 پولیس کارندہ، اسہ چنا سے تون اوار 4 بندغ زوال

کوئٹہ: کوئٹہ ٹی شاہراہ اقبال آ موٹر سائیکل اسے ٹی تخوک بمب انا ترخنگ آن 2 پولیس کارندہ و مسڑکو سے تون اوار 4 بندغ زوال وخت اس کہ نیاڑی وچناتتون اوار 15بندغ ٹھپی مسر‘ دھماکہ غان کیہی گاڈی‘ موٹرسائیکل آتے نسخان مس و دھماکہ ناسوب آن گاڈی و موٹرسائیکل آتے ٹی خاخر لگا‘ ماڑی تا شیشہ غاک پنار‘ دھماکہ نا توار مُر اسکان ہنا‘ دھماکہ نا ڈہ رسینگ آ پولیس سیکورٹی فورس و بمب ڈسپوزل اسکواڈ نا ٹیمک دھماکہ نا ہند آسر مسر علاقہ ءِ گھیڑ کرسا ٹھی و لاش تے ہسپتال آ گدریفیر، سول ہسپتال و بی ایم سی ٹی ایمرجنسی نافذ کرسا کل تمام ڈاکٹر‘ پیرا میڈیکل اسٹاف،نرس و ایلو کارندہ غاتے بٹنگ انگا‘ بمب موٹرسائیکل اسے ٹی تخنگاسس و پولیس نا گاڈی ءِ شست کننگا۔۔ وزیراعلیٰ بلوچستان میر عبدالقدوس بزنجو، گورنربلوچستان ملک عبدالولی خان کاکڑ، وزیرداخلہ میر ضیاء اللہ لانگو دھماکہ نا مذمت ءِ کرسا بے گناہ انسانی جان تا زیان و پولیس نا ورنا تا شہادت آ ارمان کرینو۔ وزیرداخلہ شار اناہنوک بروک کسر تیا سنیپ چیکنگ و ٹھپی تے درمان نا جوان آسراتی فراوان کننگ نا پرمان کرسا اوفتا دراخ جوڑی کن دعا کرینے۔ پولیس نا رد اٹ تدوک آ دے شاہراہ اقبال غا پیشیم ناوخت آ سڑک نا خڑک آ سلفوک موٹر سائیکل اٹ تخوک بمب بھلو دھماکہ سے ٹی ترخا‘ ہرانا سوب آن گاڈی و موٹرسائیکل آتے ٹی خاخر لگا‘ دھماکہ ٹی اِرا پولیس کارندہ میثم عباسی، محمد شعیب، حکمت اللہ ومسڑکو کلثوم بی بی جاگہ غا شہیدمسر وخت اس کہ دلبرخان، نثار، محمد رمضان، لعل محمد، نصیب اللہ، جان محمد، حارث، میر گل، خالد، داد محمد، سحر سیدہ، معصومہ، احمد، یعقوب، نورالدین بھاز ٹھپی مسر‘ دھماکہ نا ڈہ رسینگ آ پولیس فرنٹیئر کور و بمب ڈسپوزل نا ٹیمک جاگہ غا سر مسر لاش و ٹھپی تے ہسپتال آ گدریفنگا‘ ہسپتال آتے ٹی ایمرجنسی نافذ کننگا‘ دھماکہ غان کیہی گاڈی و موٹرسائیکل آک بھس مسر‘ خڑک انا ماڑی و دکان تا شیشہ غاک پنار۔ بمب ڈسپوزل اسکواڈ نا رد اٹ بمب موٹر سائیکل اٹ تخنگاسس‘ دھماکہ ٹی 4کلو گرام منچر کاریم اٹ اتنگا‘ حوالی نا رد اٹ دھماکہ ٹی ایس پی صدر انویسٹی گیشن نا گاڈی ءِ شست کننگا‘ لاش تے المی کارروائی آن گڈ اوفتا وارث آتے تننگا‘ مستی کارروائی پولیس کننگ اٹی ءِ۔

(آن لائن)