احساس پروگرام نا پن آ کروڑ آ روپئی تا کمیشن تننگا، شازیہ مری

اسلام آباد: بنجائی وزیر راجی رکھ و تخفیف نیزگاری شازیہ مری پارینے کہ مسکوہی حکومت نا دور اٹی احساس پروگرام نا پن آ کروڑ آ روپئی کمیشن تننگا، ساڑی حکومت بے نظیر انکم سپورٹ پروگرام کن 404 ارب روپئی جتا کرینے۔ دوشنبے نادے آ سینیٹ نا دیوان اٹی سینیٹر ثانیہ نشتر و ایلوفتا کنڈآن احساس پروگرام نا بابت قرارداد نا مخالفت ءِ کرسا اوپارے کہ راستکی تے مسخ کننگ، پروپیگنڈا و دروغ تڑنگ نا روایت شاغنگ انگ ءِ، دروغ تڑنگ انگءِ، مسکوہی حکومت نا اسہ پالیسی، وژن اس ہم الس نا دڑد الوکہ، الس نا راجی آسراتی نا پروگرام تیکن مسکوہی حکومت ہچ ءُ بجٹ اس تختو، بیرہ بینظیر انکم سپورٹ پروگرام نا بجٹ ئسک ہراڑان پیسہ کشسا تینا سیاسی فائدہ ٹی دا بجٹ ءِ کاریم اٹ اتنگا، نن تینا قومی کسبکار ناشرف ءِ کین۔ اوپارے کہ احساس نا پن انا ہچ ءُ کانودی حیثیت اس اف، 250 ارب روپئی آن 30 ارب روپئی کشسا دا پروگرام نا بناءِ کننگا، احساس پروگرام نا پن آ کروڑ آ روپئی کمیشن تننگا۔ شازیہ مری پارے کہ ساڑی حکومت بے نظیر انکم سپورٹ پروگرام کن 404 ارب روپئی جتا کرینے، داٹی بے نظیر کفالت، بے نظیر نشوونماو بینظیر تعلیم بنداوی پروگرام ءِ۔ اوپارے کہ مخلوق ءِ مفت نُت تننگ انگ ءِ، 7.8 ملین مخلوق ءِ دا نُت آتے تننگ انگ ءِ۔ چیئرمین سینیٹ محمد صادق سنجرانی دا قرارداد ءِ منظوری کن ایوان اٹ پیش کرے ہرادے ایوان مسترد کرے۔ اوکان پد پی ٹی آئی نا باسک آک ایوان آن واک آؤٹ کریر۔

(اے پی پی)