عمران خان ءِ چیئرمین نا عہدہ غان اینک کننگ نا درخواست آ فیصلہ ڈک

لاہور: لاہور ہائی کورٹ نا پنچ باسکی فل بنچ عمران خان ءِ اونا جماعت تحریک انصاف نا چیئرمین نا عہدہ غان اینک کننگ کن دائر درخواست آ فیصلہ ءِ ڈک کرے۔ جسٹس شاہد بلال حسن نا کماشی ٹی پنچ باسکی فل بنچ لاہور نا ہندی شاری محمد جنید نا دائر درخواست آ دوشنبے نادے آ بنائی سماعت کرے۔ بنچ انا ایلو باسک آتیٹی جسٹس شمس محمود مرزا، جسٹس شاہد کریم، جسٹس شہرام سرور و جسٹس جواد حسن اسک اوار ءُ۔ درخواست اٹی تحریک انصاف نا چیئرمین عمران خان و چیف الیکشن کمشنر تون اوار ایلوفتے فریق کننگانے۔ عدالت درخواست گزار نا وکیل نا دلیل آتے بِننگ آن پد عمرا ن خان ءِ پارٹی عہدہ غان اینک کننگ نا درخواست آ فیصلہ ءِ ڈک کرے۔ لاہور ہائی کورٹ قومی اسمبلی ٹی اپوزیشن لیڈرنا عہدہ غا راجہ ریاض ناتعیناتی نا برخلاف زیر سماعت درخواست آزوت فیصلہ کننگ نادائر متفرق درخواست آ بنجائی حکومت تون اوار ایلو فریق آتے نوٹس جاری کرسا ورندی بٹنگا۔ لاہور ہائی کورٹ نا جسٹس شاہد کریم شاری منیر احمد نا متفرق درخواست آ بنائی سماعت کرے۔ درخواست اٹی پیدوار کننگا کہ عدالتی پرمان آن پد ہم داسکان ورندی داخل کرفنگتنے۔ داسہ دُن تو قومی اسمبلی تینا مد ءِ پورو کننگ نا خڑک ءِ۔ خواست ءِ کہ راجہ ریاض نا اپوزیشن لیڈر نا عہدہ غا تعیناتی ءِ غیر آئینی گوندنگے۔ لاہور ہائی کورٹ قومی اسمبلی نا حلقہ 118 و108 نا ضمنی گچین کاری تے منسوخ کننگ کن دائر درخواست آ دمدستی حکم امتناعی نا خواست ءِ مسترد کرسا پگہ (چارشنبے) نادے آ اٹارنی جنرل ءِ کمکاری کن نوٹس جاری کرے۔ جسٹس شاہد کریم تحریک انصاف نا راہشون فرخ حبیب و بریگیڈیئر (ر) سید اعجاز شاہ نا درخواست آ بنائی سماعت کرے۔ دوشنبے نادے آ سماعت آ تحریک انصاف نا راہشون فرخ حبیب و بریگیڈیئر (ر) سید اعجاز شاہ نا وکیل اظہر صدیق دلیل پیش کرے و عدالت ءِ پارے کہ قومی اسمبلی نا گچین کاری تیکن 120 دے آن کم وخت رہینگانے، 120 دے آن کم وخت مرے تو ضمنی گچین کاریک مننگ کپسہ۔ درخواست اٹی پیدواری کننگانے کہ 120دے آن کم دے مننگ آ ضمنی گچین کاری کرفنگ کانود آن چپ ءِ و داوڑ گچین کاری تا ہچ ءُ گنجائشت اس اف ہنداسوب آن عدالت آن خواست ءِ کہ قومی اسمبلی نا حلقہ 118 و 108 اٹی ضمنی گچین کاری تے منسوخ کننگے۔ عدالت بنائی سماعت آ دمدستی حکم امتناعی نا خواست ءِ مسترد کرے۔ عدالت پگہ (12 اپریل) کن نوٹس جاری کرسا اٹارنی جنرل ءِ کمکاری کن بٹنگا۔

(اے پی پی)