عمران خان سی پیک و زرگزران ءِ بھس کرے، مرتضیٰ جاوید عباسی

ایبٹ آباد : بنجائی وزیر پارلیمانی باندات مرتضیٰ جاوید عباسی پارینے کہ عمران خان سی پیک ءِ چٹفے، زرگزران ءِ بھس کرے و خزانہ ءِ خورک کرسا اینو عدالت آتیان نرنگ اٹی ءِ، دا اسہ ایجنڈااسے تون بس ہرانا حکیم سعید و ڈاکٹر اسرار احمد پیشگوئی ءِ کریسر۔ داخیال آتا درشانی ءِ او داڑے ایبٹ آباد اٹی نواحی خلق بگنوتر اٹی سوئی گیس ڈٹ انا بنائی دود آن تران کرسا کرے۔ داوخت آ مسکوہی ایم پی اے سردار اورنگزیب نلوٹھہ علاقہ نا سرکڑدہ غاک ہم بھلو کچ اسے ٹی ساڑی ئسر۔ بنجائی وزیر پارے کہ 2016 ٹی الس تون ہرا نیک نیتی اٹ ہراکاریم نا قول کریسٹ اودے اینو پورو کرینٹ۔ ہراتم مسلم لیگ ن ڈٹ اس ایس تو اودے توننگ نا کوشست کننگا تانکہ مسلم لیگ ن ءِ کریڈٹ ملپ، دافک بیرہ اُراتیٹی تولسا ڈٹ جوڑ کرسا کرینو۔ اوپارے کہ ہزارہ سرکل واپڈاٹی 2400 منظور ملازمت آتیٹی بیرہ 800 نا عملہ کاریم کریکہ ہرا ہزارہ الیکٹرک کمپنی نا منظوری آن پد کچ 7800 اسکان سرمسنے، ہری پور، مانسہرہ و ایبٹ آباد اٹی 24 ارب روپئی نا ڈٹ آک پورو مریرہ۔ اوپارے کہ تحریک انصاف آن تدوک آ حساب ءِ ہلسا الیکشن ہم مریک، داپاکستان نا خذمت ءِ کننگ کپسہ۔ اوپارے کہ نواز شریف و مسلم لیگ ن ءِ دا ملک اٹی 13 سال اقتدار ملا، نن گمر اٹ پاننگ کینہ کہ 70 درسد پاکستان نا شونداری نا ڈٹ مسلم لیگ ن و نوازشریف نا پن آٹو۔

(اے پی پی)