بلوچستان ایپکس کمیٹی نا فیصلہ غاتیا عملدرآمد نا بنا

کوئٹہ : وزیراعلیٰ بلوچستان میر عبدالقدوس بزنجو ناکماشی ٹی ایپکس کمیٹی نا تدوک آدیوان اٹ کروک فیصلہ غاتیا عملدرآمد نا بناءِ کننگانے‘ اپیکس کمیٹی نا دیوان اٹ ایلو فیصلہ غاتتون اوار صوبہ ٹی قومی شاہراہ تیاخاص وڑ اٹ کوئٹہ کراچی شاہراہ غا مسافر کوچ، بس وایلو ویگن مالک و ڈیور تے سختی اٹ پارت کننگانے کہ مسافر تا جان ومال انا رکھ ءِ کننگ کن گاڈی تا رفتار نا جاچ اکن تینا گاڈی تے ٹی ٹریکر خلنگ ءِ پک کننگے‘ہمو مسافر گاڈی تے ٹی پیٹرول ڈیزل وایلو خاخر ہلوک گڑا دننگ نا رکھ انا فیصلہ غا سختی اٹ عملدرآمد کرفنگے‘ دا رد اٹ مچ آ صوبہ نا کل ضلع غاتا انتظامیہ تینا علاقہ غاتیان گدرینگوک شاہراہ تیا مسافر گاڈی تا جاچ انا بناءِ کرینے و کل گاڈی تا رفتار ءِ چیک کننگ انگ ءِ وخت اس کہ گاڈی تے ٹی پٹرول، ڈیزل وایلو خاخر ہلوک گڑاتا ساڑی گری نا چاروکی ءِ ہم کننگ انگ ءِ‘ دا رد اٹ تدوک آ دے ڈپٹی کمشنر سوراب نا پارت آ تعلقدار پولیس گاڈی تا چیکنگ نا بناءِ کرے‘ داوخت آ او سی پیک زیرو پوائنٹ قومی شاہراہ غا اسہ مسافر ویگن اسے تیل دننگ آتورے و ڈیور نابرخلاف کانود نا رد اٹ کانودی کارروائی کننگا و ایف آئی آر ہم درج کننگا‘ ڈیور تون گاڈی نا کاغد ہم سہی الوس ہرافتے جعلی وڑ اٹ بدل کننگاسس۔ چیف سیکریٹری بلوچستان عبدالعزیز عقیلی ناکنڈآن کل کمشنر‘ ڈپٹی کمشنرو صوبائی ٹرانسپورٹ اتھارٹی ءِ قومی شاہراہ تیا مسافر گاڈی تا رفتار ناجاچ کننگ و غیرکانودی گڑا دننگ ءِ توننگ کن گچین میکینزم ترتیب تننگ نا پرمان کننگانے۔

(خ ن)