عمران خان سیاست دان آخا، دہشت گرد اسے، مریم اورنگزیب

لاہور : بنجائی وزیر حوالکاری و شینکاری مریم اورنگزیب پارینے کہ عمران خان سیاست دان اس اف دہشت گرد اسے، زمان پارک دہشت گرد آتا مورچہ و پیٹرول بمب آتا لیبارٹری ءِ، ریاست، عدلیہ و پولیس نا رٹ چیلنج مریک تو ملک اٹی خانہ جنگی مریک۔ یک شنبے نادے آ داڑے پریس کانفرنس آن تران کرسا بنجائی وزیر حوالکاری پارے کہ وزیراعظم نا پارت آ نیزگار بندغ آتے مفت نُت انا بشخنگ پنجاب آن پد داسہ گلگت بلتستان و اسلام آباد اٹی ہم بناکرینے۔ بلوچستان، خیبرپختونخوا و سندھ اٹی ہم مفت نُت انا فراوانی نا بناءِ کننگک۔ اوپارے کہ حکومت دے ونن عمران خان نا شاغوک آ زرگزرانی گند ءِ ساف کننگ اٹی ءِ، حکومت عمران خان نا دستخط کروک آئی ایم ایف پروگرام نا سخت شڑت آتیا دُوارہ گپ وتران نا بناءِ کرے۔ اوپارے کہ عمران خان چار سال دا ملک آ مسلط مس، او سیاسی دہشت گرد اس جوڑ مرسا تیناسیاسی مخالف آتے پاہو نا چکی تیٹی شاغا، مخلوق نا ایڑھ ومسن تے دزگیر کرفے۔ ملکی زرگزران ءِ بھس کرے، الس ءِ بے روزگار کرے، مخلوق نا باہ آن اِرغ ءِ پُلا، نُت، بورہ، گیس، بجلی ءِ کبین کرے۔ اوپارے کہ دا بندغ اقتدار نا ہِننگ آ گنوک مسنے، اگہ ننے عمران خان ءِ دزگیر کروئی مروسس تو ننتون اختیار ہم ئسک، ریاستی واک ہم۔ اوپارے کہ عمران خان پاک کہ کنے خطرہ ءِ، ای ناجوڑ اُٹ بزرگ اُٹ، عدالت اٹ پیش مننگ کپرہ، کنے خلیرہ، دزگیر کیرہ۔ اگہ دا ناجوڑ ئس، اودے کسفنگ نا ڈٹ ئس تو ولدا درو انت مس؟ الس درو کل گڑا ءِ خنا، دا لغور بندغ عدالت اٹ پیش مننگ ہی خواپک، دا زمان پارک لاہور آن ہلیس اسلام آباد ٹرائل کورٹ اسکان سلہہ غان شپ مرسا ریاست آ جلہو کرسا اسلام آباد آ سرمس و عدالت نا مون آ پیش متو۔

(اے پی پی)