عمران خان نا دزگیری سخت ءُ کاریم اس اَلو،،رانا ثناء اللہ

فیصل آباد : پاکستان مسلم لیگ ن پنجاب نا صدر بنجائی وزیرداخلہ رانا ثناء اللہ خان پارینے کہ عمران خان ءِ دزگیر کننگ حکومت کن مشکل ءُ کاریم اس اف‘ حکومت ہرا دے آ فیصلہ کرے اودے دزگیر کننگک‘ اونا برگرکارندہ غاک اڑاند مننگ کپسہ۔ اسہ سلاہ اس دادے کہ عمران خان بایدے عدالت آتیان نابود و ہموکان اودے سزا تننگے‘ گچین کاری کرفنگ الیکشن کمیشن و ادارہ غاتا کاریم ءِ‘ گچین کاریک بایدے عمران خان نا ضد مفس‘ ولے خلیس ارے کہ دا بدبخت آ انسان یکم مئی آ اسہ پوسکن ءُ ویل اس ودی کیک۔ فیصل آباد زرعی یونیورسٹی ٹی جشنِ بہاراں نا وخت آ صحافی تتون ہیت وگپ کرسا او پارے کہ مسلم لیگ ن گچین کاری تیکن کن سنبرینگوک ءِ‘ سیاسی جماعت آک مدام گچین کاری تیکن سنبرینگوک مریرہ‘ خونی جلہو ہم اسہ دروغ اس ئس داسہ تینٹ جلہو کروک آتے بشخنگ نا پڑو کننگ اٹی ءِ‘ وخت اس کہ کس اس اوڑان بشخنداری ہم خواتنے‘ ہراتم عمران خان ایلو بندغ آتے دز وداڑیل پاریکہ تو تینٹ توشہ خانہ غان دزی کریکہ و اونا خڑک انافرنٹ مین فرح گوگی وایلوفک ارب آروپئی تا کرپشن کرسا منی لانڈرنگ کریرہ او پارے کہ گچین کاری تا وخت ءِ ودفنگ کن ترمیم کننگ نا گرج اف‘ سیاسی جماعت آک تو گچین کاری کرفنگ نازموار افس‘ نن گچین کاری تے ٹی بشخ ہلنگ کن تو سنبرینگوک ان‘ ن لیگ گچین کاری تیکن پورو وڑ اٹ سنبرینگوک ءِ۔ بنداوی موقف دادے کہ ملک انا گچینی کن گچین کاری کرفنگے‘ بایدے گچین کاریک عمران خان نا ضد انا سوب آن مفس۔ او پارے کہ عمران خان ءِ دزگیر کروئی مسکہ تو پی ٹی آئی نا برگر کارندہ غاک اڑاند مننگ کتوسہ۔ اوپارے کہ پولیس عدالت نا پرمان آ زمان پارک آ ہنانے‘ عدالت ءِ حالیت آتیان آگاہ کننگک۔ عمران خان نا دزگیری کن پولیس بسنے اونا دوبہ بیخ آن غلط ءِ‘ او عدلت آتے ٹی پیش مفننگ نا بہانہ پٹنگ اٹی ءِ۔ اوپارے کہ عمران خان آ خونی جلہو نا ہچ ءُ باندات اس اف‘ اوڑا خونی جلہو نا کہانی دروغ اسے۔ اوپارے کہ عمران خان عدالت اٹ پیش مفننگ وسزا غان بچنگ کن بہانہ پٹنگ اٹی ءِ دزگیری نا کوشست نا سوب آن او عدلت آتے ٹی پیش مفننگ ءِ‘ اوڑا توشہ خانہ نا ڈوہ بیٹ مروئی ءِ‘ اودے سماءِ کہ اگہ پیش مس تو اوڑا ڈوہ بیٹ کننگک۔ رانا ثناء اللہ خان پارے کہ ہرادے آ حکومت فیصلہ کرے ہمو دے آ عمران خان ءِ دزگیر کننگک۔

(آن لائن)