گچین کاری تے کن وڑ اف تو سوب آتے پاننگے، چیف جسٹس

اسلام آباد : چیف جسٹس پاکستان پارینے کہ اگہ گچین کاری تیکن وڑ اف تو سوب آتے پاننگے۔ پنجاب و خیبر پختونخوا (کے پی) ٹی گچین کاری تیکن سپریم کورٹ 23 فروری آ ازخود نوٹس کیس اناسماعت نا وخت آ چیف جسٹس پاکستان پارے کہ سال 2013 و 2018 ٹی اسمبلیک تینا وخت ءِ پورو کریسر۔ چیف جسٹس پاکستان عمر عطاء بندیال پارے کہ چار باسک تینٹ بنچ آن جتا مسنو‘ عدالت نا ایلو باسک آک مقدمہ ءِ بنسا کیرہ‘ آئین نا تشریح کن عدالت سماعت ءِ برجا تخک‘ آئین انت پاہک دا ہیت تشریح تون گنڈوک ءِ۔ پگہ نُہہ ونیم بجہ غا سماعت نا بناءِ کرسا چٹفنگ نا کوشست کینہ‘تانکہ پرمان ویب سائٹ آ بف ہمو وخت اسکان جاری کننگ کپنہ۔ جسٹس جمال مندوخیل نا نوٹ پرمان آن مست سوشل میڈیا غا بسوسس۔ آخبت اٹ احتیاط کینہ کہ دا وڑ انا واقعہ مف۔ جسٹس محمد علی مظہر پارے کہ گچین کاری تا تاریخ بس گڑا فیصلہ مریک کہ ہمو وخت آ گچین کاریک مننگ کیرہ یا آخا‘ مچ ءُ تُو اس زیان مس کہ گورنر سلابت نا پارینے۔ جسٹس جمال مندوخیل پارے کہ امن وایمنی نا باندات گورنر نا آخا الیکشن کمیشن نا ناءِ‘ امن وایمنی نا باندات گچین کاری تا آئینی کسر اٹ اڑاند مننگ کیک؟ ڈی جی لاء الیکشن کمیشن پارے کہ اسمبلی مد ءِ پورو کرے تو صدر مملکت گچین کاری تاتاریخ ءِ پک کننگ کیک۔ جسٹس منیب اختر نے ریمارکس تس کہ کے پی ٹی وزیراعلیٰ نا ایڈوائس آ عملدرآمد مس ولے پنجاب اٹ متو۔ وکیل علی ظفر پارے کہ اسمبلیک مفس تو آئین اٹ گورننس نا ہچ ءُ وڑ اس اف‘ ہندا سوب ءِ کہ گچین کاری تیکن 90دے پک کننگانے‘ بیرہ پڑو آخا 90 دے اٹ گچین کاری تا مننگ المی ءِ‘ یات سلے کہ سپریم کورٹ نا 2باسکی بنچ غلام محمود ڈوگر کیس اٹ 16فروری آ ازخودنوٹس کن باندات ءِ چیف جسٹس آ راہی کریسس اوکان گڈ سپریم کورٹ پنجاب و خیبرپختونخوا اسمبلی تا پننگ آن پد گچین کاری تا تاریخ تفننگ آ ازخود نوٹس ہلسا 9 باسکی بنچ ٹہیفیسس۔ پنجاب و خیبر پختونخوا (کے پی) ٹی گچین کاری تیکن سپریم کورٹ نا ازخود نوٹس کیس انا سماعت ءِ کروک 9 باسکی لارجر بنچ پنا ولے عدالت عظمیٰ نا 5 باسکی بنچ سماعت کننگ اٹی ءِ۔ سپریم کورٹ نا جسٹس اعجاز الاحسن و جسٹس مظاہر علی اکبر نقوی تون اوار جسٹس اطہرمن اللہ و جسٹس یحییٰ آفریدی ہم کیس ءِ بننگ آن بشخنداری کریر۔ سماعت نا وخت آ جسٹس محمد علی مظہر پارے کہ آئین اٹ اسہ ٹک ہم دُن اف ہرا گچین کاری تے ٹی 90 دے انا ہُرے کننگ ءِ جسٹیفائی کے‘ گڑا کس گچین کاری تے ٹی ہُرے کننگ کیک؟وکیل علی ظفر پارے کہ گچین کاری تے ٹی ہُرے مننگ کپک۔ جسٹس محمد علی مظہر ریمارکس تس کہ گورنرپنجاب باندات ءِ الیکشن کمیشن نا کورٹ اٹ بٹینے۔ وکیل علی ظفر پارے کہ گچین کاری تاریخ ءِ ملنڈی کننگانے، عدالت گورنریا الیکشن کمیشن ءِ گچین کاری تا تاریخ ءِ پک کننگ نا پرمان کننگ کیک۔ جسٹس منصور علی شاہ سوج کرے کہ گڑا لاہور ہائی کورٹ اٹ پڑک آتا پاننگ آ مقدمہ پد بٹنگانے؟ وکیل اظہر صدیق پارے کہ گچین کاری تا باندات سپریم کورٹ اٹی ءِ ہندا سوب آن ہائی کورٹ آن موخر مس۔ کیل علی ظفر پارے کہ لاہور ہائی کورٹ اٹ برجا انٹراکورٹ اپیل اٹ ہچ ءُ پرمان اس امتناع تننگ تنے۔

(مانیٹرنگ ڈیسک)