وزیراعظم نا خاص است خواہی تا بھرم،پاکستان و سعودی عرب نا نیام اٹ کشاری بشخ اٹی اہم پیشرفت

اسلام آباد، وزیراعظم نا کاٹم خواجہی ٹی پاکستان و سعودی عرب نا نیام اٹی کشاری بشخ اٹی اہم ءُ پیش رفت اس مسنے‘ ہراڑے سعودی وزیرِ ماحولیات، دیر و کشت وکشار و بنجائی وزارتِ قومی غذائی رکھ و پٹ وپول نا نیام اٹ سرسہب مذاکرات اٹی ہڑتوم آ ملک آتا تین پہ تینی واپار ءِ ودفنگ و چندی بشخ آتیٹی پوسکن ءُ کسر ملنگ آ پورو امنا کننگانے۔ دا وخت آ سعودی عرب اٹی 19 آن 22 اکتوبر 2026ء اسکان ریاض اٹی مروک آ 43می سعودی ایگریکلچر نمائش اٹی بشخ ہلنگ نا سلہ تننگانے، ہرانا پاکستان است انا ہُب اٹ ستاءِ کرینے۔ مملکت سعودی عرب و اسلامی جمہوریہ پاکستان نا نیام اٹی کشاری و غذائی رکھ انا شریداری ءِ شون تننگ نا بابت جاری مروک اسیجائی اعلامیہ نا رِداٹ، حکومت پاکستان نا سلہ غا سعودی عرب نا وزیرِ ماحولیات، دیر و کشت وکشار انجینئر عبدالرحمن اے الفضلی نا کماشی ٹی اسہ بڑزکو کہولی سعودی ڈل 26 آن 28 اگست 2026ء اسکان اسلام آباد نا دورہ ءِ کرے۔ دا ڈل اٹی وزارت ماحولیات، دیر و کشت وکشار‘ جنرل فوڈ سیکورٹی اتھارٹی و تعلقدار ایلو علاقائی و سرکاری ادارہ غاتا بڑزکو افسر آک اوار ئسر۔ وزیراعظم پاکستان محمد شہباز شریف سعودی ڈل اتون اوڑدہی کرے و جم وڑ اٹ گمانی کمکاری نا بابت ہیت و گپ کرے۔ پاکستان نا کنڈ آن مذاکرات نا کماشی ءِ بنجائی وزیر قومی غذائی رکھ وپٹ وپول رانا تنویر حسین کرے، وخت اس کہ دا وخت آ ڈل اٹ سیکرٹری واپار جواد پال، سیکرٹری قومی غذائی رکھ عامر علی احمد، وزیراعظم نا کوآرڈینیٹر کشت وکشار و غذائی رکھ احمد عمیر و پاکستان نا برنج‘ سو‘ پراسیسڈ فوڈ، فروٹ کنسنٹریٹ و بئے انا بشخ آتیان تعلقدار پرائیویٹ بشخ انا نمائندہ غاک ساڑی ئسر۔ دورہ نا وخت آ پاکستان سعودی عرب ایگریکلچر اینڈ فوڈ اسٹریٹجک پلان آ بریفنگ، اسپیشل انویسٹمنٹ فیسیلیٹیشن کونسل (SIFC)، فوجی فاؤنڈیشن، پاکستان سعودی عرب ایگری بزنس فورم تون اوڑدہی آن بیدس نیشنل ایگریکلچرل ریسرچ سینٹر (NARC) نا دورہ ہم کننگا۔ ہڑتوم آ پڑک آک 1947ء آن برجا پاکستان و مملکتِ سعودی عرب نا نیام اٹی کڑمب‘ تاریخی و ایلمی تعلقداری تے ودفنگ نا دوارگی کریر۔ ہڑتوم آ کنڈ آن سعودی عرب نا ویژن 2030 نا رِداٹ غذائی رکھ انا اولیت و پاکستان نا کشاری و غذائی برآمدی بشخ انا نیام اٹی ساڑی سوگو آ ہمگرنچی ءِ پیدوار کننگا۔ ہڑتوم آ ملک آک دا اسیجائی عزم انا درشانی ءِ کریر کہ پاکستان نا کشاری و غذائی گڑاتا سعودی عرب کن برآمد ءِ 3 ارب امریکی ڈالر اسکان سرکننگے۔ ہراڑکن بروک آ اِرا سال اٹ ہدف نا دوئی کننگ نا پورو کوشست کننگک۔ دا مسخت کن سعودی پرائیویٹ بشخ اتون اوار مرسا برنج‘ سو‘ میوہ و اوفتا کنسنٹریٹس، بئے و دیر انا بھرمی کاریم اٹ اتنگ آ تالان کشاریٹیکنالوجی ءِ اولیکو اولیت نا بشخ گوندنگا۔ برنج نا بابت ہڑتوم آ فریق آک نوٹ کریر کہ پاکستان 2025ء اٹی سعودی عرب نا برنج نا برآمدی مارکیٹ ءِ کساس 169,000 ٹن برنج فراوان ہرانا مالیت کساس 163 ملین امریکی ڈالر ئس۔