امریکی و اسرائیلی بیرہ ایران آخا کل مسلمان امت نا دشمن ءُ مجتبیٰ خامنہ ای

تہران، ایران نا رہبرِ اعلیٰ مجتبیٰ خامنہ ای خلیجی ملک آتا حکمران تیان خواست کرینے کہ او تینا حقی دشمن نا مون آ سلر۔ خلیجی حکمران آتا پن آ سوشل میڈیا غا جاری مروک تینا نوشتئی کلہو اٹی او پارے کہ امریکی و اسرائیلی ڈوہدار حکمران آک بیرہ ایران آخا بلکہ کل مسلمان امت نا دشمن ءُ، خلیجی ملک آک تینا حقی دشمن ءِ درست کیر۔ مجتبیٰ خامنہ ای تینا کلہو اٹی پارے کہ حقی دشمن نا ڈٹ آتے پُہہ مریر و اونا مون آ سلر۔ او دنیا نا کل مسلمان تیا سیوت و کننگ، دشمن تا برخلاف تین پہ تینی رکھ و تین پہ تینی کمکاری ءِ ودفنگ آ ہم زور شاغا۔ ایران نا رہبرِ اعلیٰ مجتبیٰ خامنہ ای نا دا اہم انگا کلہو رسول اکرم ﷺ نا ولادت باسعادت نا متبر آ وخت آ جاری کننگانے۔ ایلو کنڈ آ ایران نا صدر مسعود پزشکیان تہران اٹی اسہ دود اسے آن تران کرسا پارے کہ پورو واک و عزم اتون سلوک قوم ءِ کس اس سلہہ بٹنگ آبیوس کننگ کپک۔ ایرانی صدر پارے کہ نن ہچ ءُ جنگ اس بنا کتنن و نئے نن جنگ انا خواہندار اُن، ولے جلہو گیر اسے نا برخلاف پورو واکداری اٹ مون تننگ کینہ۔ ایرانی صدر مسعود پزشکیان مستی پارے کہ اگہ دنیا ٹی امن و سوگوی برجا تخوئی ءِ تو دا کاریم ننا ڈیہہ آن مون آبریک‘ تہران اٹی دود آن تران کرسا او پارے کہ پورو واک و عزم اٹ سلوک قوم ءِ کس اس سلہہ بٹنگ آ بیوس کننگ کپک۔دا وخت آ ایرانی پارلیمنٹ نا اسپیکر محمد باقر قالیباف پارے کہ پوسکن آ علاقائی معاہدہ و انتظام آک مسلمان ہمسائے ملک آتا سیکورٹی کن درملکی واکدار آتا جاگہ غا تینا لائخی تیا سیبو کننگ نا بنا مننگ کیرہ‘۔ اوپارے کہ علاقائی سیکورٹی مسلمان ملک آتا نیام اٹی کمکاری و استخواہی تا بنداو آ بایدے مرے۔ مسلمان ہمسائے تے دشمنی تا جاگہ غا ایلمی و کمکاری نا کسر تینائی کروئی تمک۔ محمد باقر قالیباف ایران اٹی جتا جتا مسلک آتا نیام اٹ سیوت ءِ قومی سوگوی و سیکورٹی نا بنداوی تمبہ گوندا۔ ایرانی وزیر خارجہ عباس عراقچی پارے کہ امریکہ لغور میڈیا نا کمک اٹ توانائی مارکیٹ اٹی ول ویچڑی کرسا جنگ ءِ بھلن کننگ نا لغور کوشست کیک۔ او پارے کہ اسرائیل تون تعلقدار آک وختی وخت اٹ است خوش کروک رپورٹ پیش کننگ اٹی ءُ ولے اصل حالیت نا باریم ءِ امریکی صارف آک ہرفنگ اٹی ءُ۔