گدان ادبی دیوان بلوچستان نا مشاعرہ، کیریئر کونسلنگ پروگرام

بلوچ اسٹوڈنٹس الائنس سوراب و گدان ادبی دیوان بلوچستان ناکنڈآن سوراب شار اٹ تعلیم نا بابت کیریئر کونسلنگ پروگرام گورنمنٹ ہائی اسکول سوراب نا ہال اٹ اڈ تننگا، ہراٹی سوراب و گدر نا تعلیم دوست شخصیت آتتون اوار راج اٹ اہم کڑد ادا کروک تپہ‘ استاد‘ ڈاکٹر‘ انجینئر‘ ادیب دانشور‘ مار و مسڑ طالب علم آک بشخ ہلکر‘ دود آن تعلیم چاہندار و ادیب و دانشور حاجی خیرجان ریکی‘ مسکوہی ڈی سی سوراب ڈاکٹر خدائے رحیم میروانی، پروفیسر ڈاکٹر عمران سرور، پروفیسر شفیق بلوچ، پروفیسر اسحاق میروانی، انجینئر نوراحمد، ایم ایس ڈی ایچ کیو سوراب ڈاکٹر ثناء اللہ ریکی، بلوچ کونسل زرعی یونیورسٹی فیصل آباد نا چیئرمین جاوید بلوچ، ابوبکر دانش بلوچ، عمران بلوچ اسک تران کریر۔

ترانکار آک پاریر کہ گدرینگوک آ کرن اٹ دنیا نا انسانک تعلیم ناپڑ آ بھاز شون ہلکنو‘ خاص وڑ اٹ سائنس و ٹیکنالوجی نا پڑ آ تو ہندن لگک کہ معجزہ غاک مسنو‘ ننا فکر و زندا نا وڑ ڈول بدل مننگ اٹی ءِ‘ جوان دا مریک کہ نن راستکی تیا ساڑی جاچ ہلین کہ دا علمی انقلاب دنیا ءِ انت تس‘ نن انت دوئی کرین‘ انت گوہان۔ دا تعلیم نا رد اٹ اسہ چنکو کوشست اسے‘ اگہ نن سجفن تو سفا خننگک، تعلیم نا معنہ دادے کہ کس ءِ گڑاس پاننگ‘ خوانفنگ‘ ہیل تننگ و راہشونی کننگ۔ اگہ نن تینا چناتے جوان تعلیم ایتن تو اوفتے جوان ءُ انسان جوڑ کننگ کینہ‘ او پاریر کہ ننا راج اٹ باوہ لمہ غاک تینا چناتے دا سوب آن خوانفرہ کہ اوفتا چنا خواننگ آن پد پیسہ کٹے او بے شک دا وڑ سجفنگ کیرہ انتئے کہ پڈ انا بین انسان نا اہم ءُ گرج اسے ولے انت کُننگ وایلو گرج آتے دوئی کننگ تعلیم نا مسخت ءِ؟ اگہ نن سجفن تو علم و لائخی تینٹ ہچ ءُ مسخت اس اف بلکہ زند انا مسخت آتے دوئی کننگ نا اسہ وڑ اسے۔

پروگرام نا اخیر اٹ سوج ورندی نا سیشن ہم مس۔ پروگرام اٹ صادق یار میروانی، ڈاکٹر خدائے رحیم، گدان ادبی دیوان بلوچستان نا چیئرمین سلام الفت، لطیف بلوچ، ڈاکٹر وحید بلوچ، راشد بلوچ، ظہور بلوچ، حبیب زہری، سردارزادہ میرمحسن شیرعلی گرگناڑی، عرفان زیب مینگل، حاجی فرید فراق مہر، شعیب عالم، کامران مینگل، قدیر میروانی، صحافی محمد نعیم ریکی، صحافی سراج احمد بلوچ و فیمیل ڈیپارٹمنٹ نا گودی ساجدہ، گودی فاطمہ گودی نسرین، گودی زہرا اسک ساڑی ئسر۔ ہال انا پیشن آ اسٹوڈنٹس الائنس سوراب ناکنڈآن بک اسٹال ہم اڈ تننگاسس۔

داکان مست گدان ادبی دیوان بلوچستان ناکنڈآن 10 محرم الحرام نا رد اٹ ٹاؤن ہال سوراب اٹ مشاعرہ اڈ تننگا‘ ہراٹی سوراب گدر آن ادب دوست شخصیت آتتون اوار شاعر ادیب و دانشور آک بھلو کچ اسے ٹی بشخ ہلکر۔ دود انا خاص انگا مہمان سوراب نا عالم دین مولوی عطاء اللہ ئس واینگلو فائل پبلک اسکول نا ڈائریکٹر انجینئر حبیب زہری اعزازی مہمان ئس وخت اس کہ پروگرام نا کماشی ءِ گدان ادبی دیوان بلوچستان نا چیئرمین سلام الفٹ کرے‘ گدر وسوراب نا پنی آ ادیب و دانشور صادق ندیم اسٹیج سیکرٹری نا فرض آتے پورو کرے‘ دا وخت آ سلام الفت، صادق ندیم، سراج احمد بلوچ، امین صابر، مراد مجروح، ستار ساقی، اقبال ساحر، جاوید فراز، رجب ساگر، سنگت الیاس بلوچ، غلام صدف بلوچستانی تینا کلام تے بنفیر‘ دود اٹ عنایت ساغر ہم ساڑی ئس۔ دا وخت آ مولوی عطاء اللہ حضرت امام حسینؓ نا بابت بیان کرے۔

گدان ادبی دیوان بلوچستان نا بنداوی باسک و مسکوہی ڈپٹی کمشنر سوراب ڈاکٹر خدا رحیم میروانی تدوک آ دے گدان ادبی دیوان بلوچستان نا باسک آتتون اوار گدر پبلک لائبریری نا دورہ ءِ کرے، و پبلک لائبریری کمیٹی ءِ کتاب آتا ٹیکی تس۔ دا وخت آ اوڑتون گدان ادبی دیوان بلوچستان نا چیئرمین سلام الفٹ، شفیق حسرت، حاجی فرید فراق مہر اسک ہم اوار ئسرہ۔ اوڑے پبلک لائبریری کمیٹی نا باسک، عرفان زیب مینگل و ظفراللہ کھیازئی اسک اوفتے بخیر کریر۔ دا وخت آ ڈاکٹر صاحب لائبریری کن چندی کتاب آتا ٹیکی تس۔ ڈاکٹر خدائے رحیم میروانی و گدان ادبی دیوان بلوچستان نا باسک آک گدر پبلک لائبریری نا بابت گپ و تران ہم کریر۔ اوفک پاریر کہ کتاب آتا اہمیت و گرج اسہ دور اسے ٹی ہم کم مننگ کپک۔ انتئے کہ ہندا ننا سیبو و سنگت مریرہ۔ ہر بندغ دا منک کہ مطالعہ کننگ آن علم اٹ ودکی مریک، ولے ہر بندغ مطالعہ کپک، مڑوئی ہرافک مطالعہ کیرہ، اوفک فائدہ ہم ہرفرہ۔ ساڑی دور اٹی مطالعہ کپننگ نا غاو لس ءِ۔ خوانندہ غا بندغ آتا اسہ بھلو کچ اس لاتمائی، و بے چکاری نا سوب آن مطالعہ کپک۔ بھاز آک تینا ملازمت آن است جم مرسا مطالعہ ءِ اِلرہ۔ پوریاگر بندغ آک تینا روزگار اٹ اختہ مننگ نا بہانہ کیرہ، و ہرافک مطالعہ کیرہ، اوفتیان ہم کیہی بندغ آک سٹی خوانرہ۔ وخت اس اسہ کتاب اس ہرفرہ، وخت اس پین اس۔ گڑا دا مطالعہ غان پد ہم ہچ اس دو بفک۔ و حاصل مطالعہ غاتا نوشتہ کننگ نا توفیق تو بھاز نصیب والا بندغ آتے دوئی مریک۔ نن کتاب انتئے خواننہ؟ ہمو ہرا گڑا داٹی ڈکوک مریک، ہرا خواننگ آن بیدس ننے ملنگ کپک۔ دا ہیت ءِ پہہ مننگ کن ننے کتاب آتے پہہ مروئی تمک۔ اوفک پاریرکہ نن بھاز خوش اُن کہ گدر کون آ علاقہ ٹی ننا ورنا چین تعلیم نا بابت تینا زمواری تے جوان سر تننگ اٹی ءِ۔ ہندا ننا قومی ہیروک ءُ، ہرا گدر نا اسہ چین اسے گدر پبلک لائبریری نا دروشم اٹ تعلیم نا کنڈ آ چکار کرفنگ اٹی ءُ۔

ہفتئی تلار
تاک: 31
27-21اگست 2021ء
پنہ: 05