شیدائی تیان بیدس کرکٹ بور مریک‘سعید اجمل

لاہور (مانیٹرنگ ڈیسک) مسکوہی ٹیسٹ کرکٹر سعید اجمل پارینے کہ شیدائی تیان بیدس کرکٹ بور مریک وخت اس کہ شیدائی تے اسٹیڈیم اٹ بننگ نا موکل تننگے۔ او پارینے کہ گوازی گرک پدی گراؤنڈ آتیا بننگ اٹی ءُ ہرا جوان ءُ ہیت اسے، دا بابت اٹ کرکٹ نا کمامدار و آئی سی سی ہم سوچو ءِ کہ ساڑی حالیت آتیٹی داخس اُرے اسکان سلنگ مننگ مفک وخت اس کہ کرکٹ نا کاریمک ہم بنا مریر۔ او پارینے کہ کراؤڈ آن بیدس کرکٹ نا مزہ خراب مریک او دا ہندن مریک دہنکہ ڈیف کرکٹ مرے، کرکٹ نا بنائی جوان ءُُ ہیت اسے ولے ای سمجھوہ کہ کراؤڈ ءِ اسٹیڈیم آتیٹی بننگ نا موکل رسینگے۔ سعید اجمل مستی پارینے کہ ڈومیسٹک اٹ ہراتم کراؤڈ مفک تو بھلا بھلا اسٹار آتیان ہرفنگے کہ اوفتے آ انت انگ گدرینگ انگ ءِ او داسہ انٹر نیشنل میچ آتیٹی ہم کراؤڈ مفک تو بوریت ودک، گوازی گرتے ہچ مزہ تفک، اگہ اسٹیڈیم نا اسہ بشخ اٹ 10 ہزار بندغ نا تولنگ نا گنجائشت ارے تو اوڑے ہزار تماشائی تے بننگ نا موکل تننگے ولے کراؤڈ نا مننگ المی ءِ۔ مسکوہی ٹیسٹ کرکٹر مستی پارینے کہ پاکستان ٹیم نا باؤلنگ بھاز جوان ءِ، پاکستان نا ٹیسٹ رینکنگ ہم کم ءِ وخت اس کہ اونا مقابلہ ٹی انگلینڈ نا ٹیم آزموندہ کار ءِ ہندا سوب آن ننا ٹیم کن فریشان مننگ کیک، سیریز اٹ اگہ پاکستان ٹیم انگلینڈ ٹیم ءِ ٹف ٹائم ہم ایتے تو دا بھلو ہیت اس مریک۔ او پارینے کہ پاکستان ٹیم ءِ محنت کروئی تمک، سیریز ءِ کٹنگ بھاز سخت لگک ولے اسہ میچ اس کٹنگ ہم بھلا سرسہبی اسے، کنا نیک انگا اُست خواہیک ٹیم اتون اوار ءُ۔