وزیر اعظم نا کماشی ٹی کابینہ کمیٹی توانائی نا دیوان،پاکستان آئل ریفائننگ پالیسی 2023ء اٹی سلاہ ئی ترمیم آتا منظوری

کابینہ کمیٹی توانائی پاکستان آئل ریفائننگ پالیسی 2023 اٹی سلاہ ئی ترمیم آتا منظوری ءِ تس، وخت اس کہ وزیراعظم محمد شہباز شریف آئل ریفائنریز نا اپ گریڈیشن ءِ وخت انا اہم ءُ گرج اس گوندسا پارینے کہ پوسکن آ خواست آتتون ہم گرنچ ریفائنریز نئے بیرہ ملک انا توانائی نا گرج آتے گچین وڑاٹ پورو کیک بلکن درآمدی ایندھن آ سیبو ءِ کم کننگ و چاگڑد دوست ایندھن نا فراوانی ٹی ہم کمکار مریک۔ وزیراعظم محمد شہباز شریف نا کماشی ٹی کابینہ کمیٹی توانائی نا دیوان سے شنبے نادے آ وزیر اعظم ہاؤس اٹی اڈ ہلک۔ وزیرِ اعظم آفس نا میڈیا ونگ انا کنڈآن جاری بیان نا رداٹ دیوان اٹی بنجائی وزیر احد خان چیمہ، محمد اورنگزیب، علی پرویز ملک، احسن اقبال، تعلقدار بنجائی سیکرٹری و بڑزکو سرکاری کمامدار آک بشخ ہلکُر۔ دیوان اٹی پاکستان آئل ریفائننگ پالیسی 2023 اٹی سلاہ ئی ترمیم آتا منظوری ءِ تننگا۔ دیوان آن تران کرسا وزیرِ اعظم پارے کہ آئل ریفائنریز نا اپ گریڈیشن وخت انا اہم ءُ گرج اسے ودا پاکستان نا توانائی نا رکھ انا جامع نظام نا اسہ اہم ءُ تمبہ اسے۔ او پارے کہ پوسکن آ خواست آتتون ہم گرنچ ریفائنریز نئے بیرہ ملک انا توانائی نا گرج آتے گچین وڑاٹ پورو کیک بلکن درآمدی ایندھن آ سیبو ءِ کم کننگ و چاگڑد دوست ایندھن نا فراوانی ٹی ہم کمکار مریک۔ دیوان ءِ حوال اٹی پاننگا کہ ساڑی ریفائنریز نا پیداواری لائخی ءِ ودفنگ کن اونا اپ گریڈیشن المی ءِ، یورو 4 و یورو 5 آب انا ایندھن نا پیداوار پاکستان نا جہانی چاگڑدی قول آتا پوروی، فضائی کچٹی ٹی کمتی و الس ءِ گچین آب انا ایندھن فراوان کننگ کن المی ءِ۔ وزیراعظم پارت کرے کہ اوگرا نا کارکڑد ءِ گچین کننگ و مارکیٹ نا گرج آتے پورو کننگ کن اصلاحات کننگے تانکہ توانائی نا بشخ اٹی گوبر‘ شفافیت و زرکاری ءِ مونی دننگ مرے۔ وزیراعظم زور شاغا کہ پوسکن آ پالیسی نا نفاذ آن پد داڑا گچین و وخت آ عملدرآمد ءِ المی جوڑ کننگے و دا بابت ڈیوالئی یا ہرے ءِ اسُل سگنگ مفک۔ او تعلقدار وزارت و ادارہ غاتے پارت کرے کہ غٹ اسٹیک ہولڈر آتتون خڑکی رابطہ تخسا اصلاحاتی عمل ءِ ترند کننگے۔ وزیراعظم پارے کہ حکومت توانائی نا بشخ اٹی مدامگی اصلاحات، پوسکن آ ٹیکنالوجی نا مونی دننگ و زرکاری کن گچین چاگڑد اس فراوان کننگ کن غٹ گمانی گام گیج آتے برجا تخک۔ وزیرِاعظم براؤن فیلڈ ریفائنریز نا بابت ترمیم مروک پاکستان آئل ریفائننگ پالیسی 2023 نا ترویج کن قطر، سعودی عرب و ایلو خلیجی ملک آتیٹی روڈ شوز اڈ تننگ نا پارت کرے۔ وزیراعظم براؤن فیلڈ ریفائنریز نا بابت ریفائننگ پالیسی ٹی ترمیم نا بابت وزیر پٹرولیم و اونا ٹیم انا کاریم و کارکڑد نا ستاءِ کرے۔ وزیراعظم ملک اٹی پٹرولیم نا اسٹریٹجک ریزروز ءِ ودفنگ نا پارت ہم کرے۔ دیوان ءِ ملک اٹی آئل ریفائنریز نا اپ گریڈیشن، توانائی نا بشخ اٹی اصلاحات و پالیسی آ عملدرآمد نا پیش رفت آ سرجم حوال تننگا۔ دیوان ءِ پاننگا کہ براؤن فیلڈ ریفائنریز نا بابت پاکستان آئل ریفائننگ پالیسی 2023 اٹی کننگوک ترمیم آتا مسخت چاگڑد دوست یورو-V تون خڑکی تخوک پٹرول و ڈیزل نا پیداوار ءِ المی جوڑ کننگ، فرنس آئل و کم معیار نا پٹرولیم اٹی کمتی اتنگ ءِ۔