قائد اعظم لائبریری کوئٹہ ءِ پاکستان نا بے مٹ لائبریری جوڑ کینہ،وزیر اعلیٰ میر سرفراز بگٹی

وزیراعلیٰ بلوچستان میر سرفراز بگٹی قائد اعظم لائبریری کوئٹہ نا طالب علم آتا غاو آ دمدستی نوٹس ہلسا اوفتے چیف منسٹر سیکرٹریٹ آ بٹنگا، ہراڑے او طالب علم آتتون اوڑدہی کرے، اوفتا ویل، سلاہ و گرج آتے خف تورے و جاگہ غا کیہی اہم انگا فیصلہ غاتے کرسا تعلقدار کمامدار آتے دمدستی عملدرآمد نا پارت کرے۔ وزیراعلیٰ بلوچستان دا وخت آ قائد اعظم لائبریری کوئٹہ ءِ پاکستان نا دروری و پوسکن وڑ لائبریری جوڑ کننگ نا پڑو ءِ کرسا پارے کہ بروک آ مسہ تُو اٹی دا ادارہ ءِ پوسکن آ خواست آتتون ہمگرنچ کننگک۔ او پارت کرے کہ لائبریری ٹی پوسکنوڑ ڈیجیٹل لیب جوڑ کننگے، جتا جتا بشخ آتتون تعلقدار پوسکن آ ایڈیشن نا آب اٹنگا کتاب آتے فراوان کننگے، وخت اس کہ کولنگ سسٹم و سولر سسٹم ءِ دمدستی وڑ اٹ فعال کننگے تانکہ طالب علم آتے جوان تعلیمی و مطالعاتی چاگڑد دوئی مرے‘ میر سرفراز بگٹی پارے کہ حکومت بلوچستان ورناتے تینا شونداری پالیسی تا ہند تکک و اوفتا خیال، سلاہ و ویل آتے دراست بننگ حکومت نا زمواری ءِ۔ او پارے کہ ورنا و ریاست نا نیام اٹی پت و رابطہ غاتے پین سوگو کننگک تانکہ اسہ پتدار‘ پامدار و شوندار راج اسے نا بنداو تخنگ مرے۔ وزیراعلیٰ پارے کہ تعلیم، پٹ وپول‘ خواننگ و پوسکنوڑ علم اسکان رسینگ ورنا تا بنداوی حق ءِ‘ ہرانا فراوانی کن حکومت عملی گام گیج کننگ اٹی ءِ۔ او دا عزم انا درشانی ءِ کرے کہ مچ آ بلوچستان اٹ تعلیمی ادارہ و لائبریری تے پوسکنوڑ آسراتی تیان شپ کننگک تانکہ ورناتے تینا لائخی تا درشانی و علمی شونداری نا بریبر وارخواہی دوئی مرے‘ اوڑدہی نا وخت آ طالب علم آک وزیراعلیٰ بلوچستان نا کنڈ آن اوفتا ویل آتا دمدستی ایسری، قائداعظم لائبریری نا جوانی کن کروک آ پڑو و ورنا تتون دراست ہیت وگپ نا ریسہ نا ستاءِ کرسا دا گام ءِ تعلیم دوست و ورنا دوست وژن نا عملی شاہدی گوندار۔