بنجائی کابینہ نا دیوان اٹی اسہ ملین ٹن خولم درآمد کننگ نا فیصلہ،نیوی سلینک کلب نا عدالتی فیصلہ نا ستا

اسلام آباد ( آن لائن) بنجائی کابینہ پٹرول کاختی آ کمیشن جوڑ کننگ نا منظوری تسنے وخت اس کہ اسہ ملین ٹن خولم درآمد کننگ نا فیصلہ کننگانے، دیوان نا بشخندار آک بُورہ اسٹاک کروک آتا برخلاف سخت کارروائی کرسا اوفتے سزا تننگ آ اوار مسنو۔ کابینہ باسک آک نیوی سیلنک کلب نا عدالتی فیصلہ ءِ جوان تکسا معاملہ ءِ سی ڈی اے آ گدریفنگانے او پارت کرینے کہ کانود نا رداٹ فیصلہ کننگے۔ حوال نا رداٹ کہ تدوک آ دے وزیر اعظم عمران خان نا کماشی ٹی بنجائی کابینہ نا دیوان مس، کیہی وزیرک ویڈیو لنک انا کمک اٹ دیوان اٹ بشخ ہلکر۔ دیوان 13 ٹِکی ایجنڈا آ سجفنگا او پد آن کل ایجنڈا آئٹم تا منظوری ءِ تننگا۔ بنجائی کابینہ نا دیوان اٹ ملکی سیاسی و زرگزرانی حالیت آتا جاچ ءِ ہلنگا۔ کابینہ دیوان اٹ ملکی زرگزرانی حالیت آتیا بریفنگ تننگا وخت اس کہ کابینہ باسک آتے زرگزرانی اعشاریہ غاتا بابت اٹ معلومدار کننگا، ملکی ساڑی حالیت و کورونا وائرس نا سوب آن مروک آ نسخان آ ہم بریفنگ تننگا، میڈیا ہاﺅس آتا وام تا تننگ آ ہم کابینہ ءِ خوڑتی اٹ معلومدار کننگا، کابینہ باسک آتے عئید آن مست مارکیٹ آتا بندی آ سلاہ ٹی ہلنگا۔ وزیراعظم عمران خان پیٹرول کاختی ٹی اختہ انگا بندغ آتے سزا ترفنگ نا ہیت آ اسٹ مسنو۔ کابینہ پٹرول کاختی آ کمیشن اس جوڑ کننگ نا منظوری تس ہرانا رداٹ کمیشن نا باسک و کماش ءِ زوت اس گچین کننگک، بنجائی کابینہ ءِ بُورہ نا دوئی کننگ نا بابت اٹ بریفنگ اٹ جوان بریفنگ تس۔ بنجائی کابینہ اسلام آباد نا نیوی سیلنگ کلب نا ویل آ سی ڈی اے ءِ کانود نا رداٹ کارروائی نا پارت کرینے۔