پاکستان اسٹاک ایکسچینج آ جلہو، سب انسپکٹر، 4 سیکورٹی گارڈ و اسہ شاری اس شہید،4 دہشت گرد خلنگار

کراچی (اے پی پی) پاکستان اسٹاک ایکسچینج اٹی جلہوگیر دہشت گرد آتا پترینگ انگ نا کوشست ءِ پولیس بے سہب کرے، پولیس و دہشت گرد آتا نیام اٹ اسہ ایلو آ سم کاری ٹی چار دہشت گرد آتے خلنگا۔سب انسپکٹر شاہد دہشت گرد آتا سم کاری آن شہید مس وخت اس کہ جلہو اٹی 4 سیکورٹی گارڈ و اسہ شاری اس ہم شہید مس۔ ترجمان کراچی پولیس نا کنڈآن دوشنبے نادے آ جاری کروک اعلامیہ نا رداٹ اسہ ایلو آ سم کاری ٹی پترینگوک آ درگہ غا ڈیوٹی آ ساڑی کراچی پویس نا سب انسپکٹر شاہد دہشت گرد آتا سم کاری آن شہید مس وخت اس کہ مسہ پولیس کارندہ ٹھپی مسر، جلہو گیر دہشت گرد آتا برخلاف پولیس نا وخت آ کارروائی آن پاکستان اسٹاک ایکسچینج اٹی ساڑی غٹ عملہ و ماڑی بھلو تباہی سے آن رکھ مس۔ ترجمان مستی پارے کہ جلہو گیر دہشت گرد آتا کنڈآن سم کاری و دستی بمب جلہو اٹی چار سیکورٹی گارڈ و اسہ شاری اس ہم شہید مسنے، پولیس نا کنڈآن دہشت گرد آتون ساڑی پوسکن آ سلہہ ہینڈ گرینڈ، بارود و ایلو گڑاتے ہم کوزہ ٹی ہلنگانے۔ اوپارے کہ پولیس و رینجر آتا کنڈآن علاقہ ءِ کلیئر کننگ کن پاکستان اسٹاک ایکسچینج نا ماڑی و چارما کنڈ سرچنگ نا عمل برجاءِ۔ ترجمان پارے کہ پاکستان اسٹاک ایکسچینج نا ماڑی نا خڑک شکبر کارءِ ہم چیک کننگ انگ ءِ۔ ایڈیشنل آئی جی کراچی نا کنڈآن مچ آ شار اٹی ساڑی اہم تنصیبات سرکاری دفتر و کاروباری و واپاری ہند آتا سیکورٹی ءِ پین سخت کننگ نا پارت ہم جاری کننگانے۔