ملک ءِ لٹوک آک احتساب آن خلنگ اٹی ءُ‘ عمران خان 

لاہور(آن لائن) وزیراعظم عمران خان پارینے کہ پاکستان اٹ کورونا وائرس نا کیس آک ودنگ اٹی ءُُ، ملک اٹ ارٹمیکو چُلک نا خلیس ارے، بروک آ 2 تو ءِ پام اٹ گدریفوئی مریک۔ کورونا نا برخلاف پاکستان اہم ءُُ جنگ اس کننگ اٹی ءِ دا جنگ اٹ ڈاکٹر تتون اوار کل ہیلتھ ورکر آک ہم ستا کڑزرہ۔ اُلس ہرفک کہ ہرانگ ہنا پُوسکن آ پاکستان، پُوسکن آ پاکستان سوئچ اس اف کہ اسہ دم اتون جوڑ مرے۔ بدلی اسہ پدریسہ ءُُ جہد اسے نا پن ءِ، ننے ریاست مدینہ نا اصول آتیان ہیل کروئی تمک، لمہ ءِ کنا کینسر مس تو خلیس مس کہ پاکستان اٹ ہسپتال آتا آب شیف مرسا ءِ، پُوسکن آ ادارہ غاتا جاگہ غا متکن آ ادارہ غاتے جوان کننگ سخت مریک۔ لاہور و پشاور شوکت خانم ہسپتال 3 سال اٹ جوڑ مسر۔ پشاور لیڈی ریڈنگ ہسپتال و خیبر ٹیچنگ ہسپتال اٹ ریفارمز اتنگ کن بھاز سختی پیش بس، ہر جاگہ مافیا تا سوب آن بدلی ٹی ویل آک مون تروک ءُُ، ملک ءِ لٹوک آتا احتساب مننگ اٹی ءِ، ہندا سوب آن اوفک خلیس اٹی ءُُ۔ دا بندغ آتے سما ءِ کہ دا وزیراعظم بلیک میل مفک، کل جیب خلوک آک اسہ اسٹیج آ اسٹ مسنو۔ ڈاکٹر یاسمین ءِ پارینٹ کہ اولیکو مرحلہ ٹی غریب و جنوزان تے ہیلتھ کارڈ تننگے۔ اسہ سال اٹ پنجاب نا کل بندغ آتے ہیلتھ کارڈ ایتنہ۔