تدوک آدے اٹ 825 بندغ نا کورونا ٹیسٹ مثبت، 14 مرک انا گواچی‘ این سی او سی

اسلام آباد (اے پی پی) نیشنل کمانڈ اینڈ آپریشن سینٹر (این سی او سی) کورونا دین انا بابت تازہ حساب وکتاب ءِ جاری کرینے۔ چارشنبے نادے آ این سی او سی آن جاری کروک حساب وکتاب نا رداٹ تدوک آ 24 گھنٹہ ٹی کورونا دین انا 825 ناجوڑ آتا ٹیسٹ مثبت بس و 14 بندغ دا دین آن زوال کریر ہرافتیان 13 بندغ ہسپتال آتیٹی و اسہ ناجوڑ اس اُراٹی قرنطینہ ٹی دا دین آن زوال کرے۔ تدوک آ 24 گھنٹہ ٹی کوویڈ۔ 19 نا 29 ہزار 477 ٹیسٹ کننگا ہرافتیان سندھ اٹی 8 ہزار 860، پنجاب اٹی 11 ہزار 56، خیبرپختونخوا ٹی 4 ہزار 23، اسلام آباد اٹی 4 ہزار 23، بلوچستان اٹی 838، گلگت بلتستان اٹی 181، آزاد کشمیر اٹی 564 ٹیسٹ اوار ءُُ۔ داتم اسکان مچ آ ملک اٹی کوویڈ۔ 19 آن دراخ جوڑ مروک آتا کچ 3 لکھ 11 ہزار 814 مسنے۔ آزاد کشمیر، گلگت بلتستان و بلوچستان اٹی کوویڈ۔ 19 نا اسہ ناجوڑ اس ہم داوخت آ وینٹی لیٹر آ اف وخت اس کہ مچ آ ملک اٹی کوویڈ۔ 19 کن جتا 1 ہزار 884 وینٹی لیٹر آتیا کوویڈ۔ 19 نا 98 ناجوڑ ءُُ۔ مچ آ ملک اٹی کوویڈ۔ 19 نا ایکٹیو کیس آتا کچ 11 ہزار 627 ءِ۔ مچ آ ملک اٹی کورونا دین آن زہمی بندغ آتا کچ 3 لکھ 30 ہزار 200 ءِ ہرافتیان آزاد کشمیر اٹی 3 ہزار 889، بلوچستان اٹی 15 ہزار 859، گلگت بلتستان اٹی 4 ہزار 200، اسلام آباد اٹی 19 ہزار 300، خیبرپختونخوا ٹی 39 ہزار 189، پنجاب اٹی 1 لکھ 3 ہزار 314 و سندھ اٹی 1 لکھ 44 ہزار 449 ناجوڑ ءُُ۔