ملک ءِ پلوک آتے ہچ گہس این آر او تننگ کپنہ، عمران خان

سلام آباد(آن لائن)وزیراعظم عمران خان پارینے کہ ملک ءِ پلوک آتے ہچ گہس این آر او تننگ کپنہ او دا بابت اٹ تینا منشور آ ہچ ءُ سمجھوتہ اس کپنہ، غریب اُلس نا فلاح وبہبود ءِ اولیت ایتنہ، ہندا سوب آن احساس پروگرام نا رداٹ بنا کروک آ ڈٹ آتا فوکس غریبی نا چکی ٹی نسنگوک آ بندغ آک ءُ، علماء دینک مذہبی ہم آہنگی نا شون تننگ کن تینا کڑد ءِ ادا کیر، او پنی آ مذہبی راہشون حافظ طاہر اشرفی تون ہیت وگپ کرے ہرا تدوک آ دے وزیراعظم آفس اٹ اوڑدہی کرے۔ حوال نا رداٹ حافظ طاہر اشرفی دینی مدارس ءِ قومی دھارے ٹی اتنگ او اسہ نصاب اسے نا بابت اٹ حکومت نا پالیسی تا ستا ءِ کرسا پارے کہ دینی مدرسہ غاتا طالبعلم آک پُوسکن آ علم ءِ ہیل کننگ اٹی ءُ تانکہ ساڑی دور انا خواست آتون مقابلہ کننگ کیر۔ او وخت آ وزیراعظم عمران خان پارینے کہ دا وخت آ ملک ءِ ہرا چینلنج آک مون تروک ءُ اوفتے تون مون تننگ کن حکومت کل وسیلہ غاتے کاریم اٹ اتنگ ءِ۔ کورونا دین اٹ کمتی آن پد زرگزرانی حالیت اٹ جوانی بننگ اٹی ءِ او داسہ او غریب بندغ آتا زندگی انا آب ءِ جوان کننگ نا کنڈ آ سجفنگ اٹی ءِ۔ ہندا سوب آن احساس پروگرام نا رداٹ ارب آ روپئی میرٹ آ بشخ و پانٹ کننگانے۔ او پارینے کہ ہرا بندغ آک ملک ءِ پلانو اوفک ہچ ءُ رعایت اسے نا حقدار افس، او دن انگا بندغ آتے ہچ ءُ حالیت اسے ٹی این آر او تفنہ وخت اس کہ کرپٹ بندغ آتا برخلاف ترندی ٹی کارروائی مرے۔ وزیراعظم پارینے کہ تحریک انصاف تینا منشور آ ہچ ءُ سمجھوتہ اس کپک او ہندا ڈٹ آتے زیات آن زیات اولیت تننگ اٹی ءِ، ہراڑان اُلس ءِ زیات فائدہ مرے۔ او وخت آ وزیراعظم مذہبی رواداری او بین المذاہب ہم آہنگی آ زور شاغا او پارے کہ علماء کرامک ہم دا بابت اٹ تینا کڑد ءِ ادا کیر۔