تعلیم قومی ءُُ احساس و زمواری سے نا پن ءِ‘امان اللہ یاسین زئی

کوئٹہ (خ ن) گورنربلوچستان امان اللہ خان یاسین زئی پارینے کہ تعلیم نہ بیرہ ہر وڑ نا شونداری نا بنداو ءِ وخت اس کہ اسہ قومی ءُُ احساس و زمواری اسے نا پن ءِ۔ ہڑتوم آ حالیت آتیٹی اُستاد آتا جوان انگا کڑد ءِ اینک کننگ کپنہ۔ گورنر یاسین زئی پارینے کہ نن مچ آ صوبہ نا پبلک سیکٹر یونیورسٹی تا کل اُستاد آتے دوئی مروک آ ویل و سختی تیان نہ بیرہ معلومدار اُن وخت اس کہ اوفتے جوان وڑاٹ ایسر کننگ کن جوان کوشست کننگ اٹی اُن۔ دا خیال آتا درشانی ءِ او تدوک آ دے گورنرہاوس کوئٹہ ٹی رکن صوبائی اسمبلی و مسکولی وزیر اعلیٰ نواب محمد اسلم رئیسانی نا کماشی ٹی یونیورسٹی آف بلوچستان و لسبیلہ یونیورسٹی نا پروفیسر آتا ڈل اسے تون ہیت وگپ کرسا کرے۔ او وخت آ گورنر بلوچستان پارے کہ قوم تا جوان انگا آخبت تعلیم و تعلیمی ادارہ غاتون گنڈوک مریرہ وخت اس کہ تعلیم نا بشخ اٹ  میرٹ نا خرابی و بے وڑی نا ہچ ءُُ گنجائشست اس اف۔ اُستاد آتا تعیناتی آن ہلیس اسٹوڈنٹ آتا داخلہ غاتسکان میرٹ نا پاسداری ءِ اولیت ایتنہ۔ گورنر بلوچستان امان اللہ خان یاسین زئی پارینے کہ ننا جوان انگا کوشست آتیان صوبہ نا بڑزکو  تعلیمی ادارہ غاتیٹی جانجوڑ ءُُ تعلیمی چاگڑد اس جوڑ مس۔ دا بابت اٹ یونیورسٹی تا اُستاد و اسٹوڈنٹ آتے کل المی آ آسراتی تے تننگ و اوفتا سختی تے جوان بنداو آ ایسر کننگ ننا اولیکو زمواری تیٹی اوار ءِ۔ گورنر یاسین زئی راج انا گچین آتے بندغ آتے پارے اوفک مونی بریر و راج اٹ بردباری، جمہوری آ رویہ غاتا جوانی ٹی کڑد ادا کیر۔