کورونا و لاک ڈاﺅن

شونگال

0

Get real time updates directly on you device, subscribe now.

کورونا نا ویل دنیا ٹی اسہ پوسکن ءُ دروشم اس تالان کرینے۔ و داڑان پد تموک آ ملک آتتون اوار شوندار آ ملک آک ہم فریشان ءُ۔ حالیت دادے کہ شوندار آ ملک آتیٹی دا ناجوڑی آن مروک آ مرک آک پد تموک ملک آتیان زیات ءُ۔ مرک آتیان بیدس دا دین آن ہرا ایلو ویل مون آ بسنے، او زرگزران نا ہم ارے، کہ دا ناجوڑی آن بچنگ کن داسکان ہچ ءُ ویکسین اس جوڑ مننگ کتنے، کہ دانا توننگ کن مہالو آن تیاری اس مننگ کے۔ و داڑان بچنگ نا بیرہ اسٹ انگا کسر ’لاک ڈاﺅن‘ ءِ پاننگانے۔ و لاک ڈاﺅن نا مطلب دادے کہ زرگزرانی حالیت آتے ’بریک‘ لگک۔ مچ آ دنیا ٹی چین ہمو اسٹ انگا ملک ءِ ہراڑے لاک ڈاﺅن کل آن زیات سرسہب مس۔ داکان بیدس پین ہم منہ ملک اریر، ہرافتیٹی لاک ڈاﺅن سرسہبی نا کنڈ آ ہِننگ ءِ۔ ولے دنیا نا گیشتری ملک آتیٹی لاک ڈاﺅن آ عمل مننگ کتنے یا متنے۔ دانا ہم سوب آک اریر، بھاز جاگہ غاتیا دا گمان کننگا کہ دا ناجوڑی بیرہ طبی وڑ اٹ نزور آ بندغ آتیا جلہو کیک، وخت اس کہ جانجوڑی نا بشخ انا چاہندار آتا پاننگ دادے کہ کورونا نا ہلنگ نا بابت دا سلاہ تننگتویسس، بلکن دا ہیت ناجوڑی نا ہلنگ آن پد مرک انا کچ آتا بابت ئس۔ دن پا کہ دا ناجوڑی ہلنگ کن کل ءِ ہلنگ کیک، ولے دا طبی وڑ اٹ نزور انگا بندغ آتیا زیات زوراک مریک، و اوفتا مرک انا گمان زیات ءِ۔ دا غلط گمانی نا سوب دا مس کہ امریکہ، اٹلی، و فرانس کون آ ملک آتیٹی دا بھاز ترندی اٹ تالان مس۔ اوڑے جوڑ مروک آتا کچ ہم زیات ءِ، ولے دن کہ اوڑے کورونا غان ناجوڑ مروک آتا کچ زیات ئس، تو اوڑے ہم طبی نزور آک ہم زیات مرور، گڑا مرک آک ہم زیات مسر۔ ایلو کنڈ آ لاک ڈاﺅن آن نمن مروک آ ہمو دنیا ءِ، ہراڑے زرگزرانی ویل آک زیات ءُ۔ اوڑے حالیت دادے کہ اگہ لاک ڈاﺅن مریک تو مخلوق لنگڑی آن کہیک، و اگہ مفک تو کورونا غان کہنگ نا گمانک ودرہ۔ ہرا ملک آتا زرگزران نزور ءِ، اوفک تینا الس تون کمکاری نا وڑ اٹ مفسہ، ہرانا سوب آن اوفک لاک ڈاﺅن آ ہم زیات زور شاغنگ کپسہ۔ پاکستان ہم ہمو ملک آتیان اسٹ اسے ہرا تینا الس ءِ اوفتا اُرا ٹی کنوئی گڑا رسیفنگ نا وڑ اٹ اف۔ دا حالیت آتیان پد بنجا نا کنڈآن لاک ڈاﺅن نا مخالفت کننگ انگ ءِ، و جواز کن دا پاننگ انگ ءِ کہ اگہ لاک ڈاﺅن مس تو مخلوق لنگڑی آن کہیک، و دا بابت اسہ پروگرام اسے نا ہم بنا کننگانے، ہراڑکن الس آن چندہ کرسا الس نا نزور آ تپہ غاتے کمک رسیفنگک، یا رسیفنگ انگ ءِ۔ وخت اس کہ صوبہ غاک انتظامی وڑ اٹ لاک ڈاﺅن نا خواہندار ءُ۔ و تینا منّت آ دانا پڑو ہم کریر، داڑا اخس عمل مننگ ئس دا تینٹ اسہ سوج اسے۔ ولے داسہ کہ کورونا ہندی وڑ اٹ زیات تالان مننگ اٹی ءِ، دا لاک ڈاﺅن اٹ نرمی اتنگانے، ہرا یخین اٹ دا ناجوڑی ءِ پین تالان کننگ نا سوب جوڑ مننگ کیک، و گمان دادے کہ اگہ لاک ڈاﺅن آ جوانی اٹ عمل متو تو دا ناجوڑی خاص وڑ اٹ بلوچستان نا علاقہ غاتیٹی ہرا ترندی اٹ تالان مننگ نا بناءِ کرینے، دا تالانی پین ترند مریک۔

ہفتئی تلار، تاک 16

18-24، April  2020

Get real time updates directly on you device, subscribe now.

Leave A Reply

Your email address will not be published.