بورہ تنکی کمیشن ءِ جاست پاست کن مسہ ہفتہ پین رسینگا

اسلام آباد( آن لائن) بنجائی کابینہ بورہ تنکی آ انکوائری کمیشن ءِ مسہ ہفتہ پین وارخواہی تسنے۔ تدوک آ دے وزیراعظم عمران خان نا کماشی ٹی بنجائی کابینہ نا ویڈیو لنک دیوان اڈ ہلک، ہراٹی چندی باندات آتیا سجفنگا۔ و کیہی اہم انگا منظوریک ہم تننگار۔ کابینہ دیوان اٹی وزیر خارجہ شاہ محمود قریشی تون اوار ایلو وزیرک ساڑی ئسر، ویڈیو لنک نا خرابی نا سوب آن منہ وزیر بشخ ہلنگ کتوس، کابینہ 12 ٹِک آ تالان ایجنڈا نا منظوری ءِ تس۔ بنجائی کابینہ مسابقتی کمیشن نا قائم مقام چیئرپرسن تعیناتی، کیہی لمیٹڈ کمپنی تا ڈائریکٹر آتا خورک اسامی تیا پنداری، پاکستان پیٹرولیم کمپنی، سوئی نادرن گیس، پاکستان منرل ڈویلپمنٹ، آئل اینڈگیس کمپنی ٹی پندارنگ، و مالیاتی معاہدہ غاتا بابت بل 2020ءانا منظوری ءِ تس۔ حوال آتا رد اٹ بنجائی کابینہ اقتصادی رابطہ کمیٹی نا فیصلہ و کورونا وائرس نا بابت جوڑ قومی رابطہ کمیٹی نا فیصلہ غاتے پک کرے۔ کابینہ کانودی مقدمہ غاتا بابت کابینہ نا کمیٹی نا فیصلہ غاتے ہم پک کرے۔ حوالی تا رد اٹ بنجائی کابینہ لاک ڈاو¿ن ءِ 9 مئی اسکان ودنگ نا قومی رابطہ کمیٹی نا فیصلہ ءِ ہم پک کرے۔ کابینہ کورونا تون جنگ کروک طبی کارندہ غاتا کمکاری کن پیکیج اسے نا منظوری ءِ تس۔ وخت اس کہ چنکا کاروبار کروک آتے کن 75 ارب روپئی نا پیکیج اس پک کرسا صحافی و صحافتی ادارہ غاتا مالی کمک نا پیکیج اسے نا ہم منظوری ءِ تس۔ کابینہ دیوان اٹی پاک عرب ریفائنری بورڈ آف ڈائریکٹر نا اول سر ٹہیفنگ نا منظوری تننگا وخت اس کہ واپڈا نا فنانس باسک انا تقرری نا باندات ءِ پد بٹنگا۔ اقتصادی رابطہ کمیٹی نا دیوان تیٹی کننگوک فیصلہ غاتے پک، مالیاتی معاہدہ غاتا بابت بل 2020ءآ بریفنگ آنپد منظوری ءِ تِس۔ کابینہ ہیلتھ کیئر ورکر آتے کن کمکی پیکیج و وزارت خزانہ نا کنڈ آن پیش کروک اِرا بل انا مسودہ ءِ ہم منظور کرے۔ حوال آتا رد اٹ دیوان نا وخت آ وزیر اعظم نا خصوصی پرسجوئی کمکار شہزاد اکبر بورہ انکوائری کمیشن نا بابت کابینہ ءِ بریفنگ تس، اوکان پد کابینہ بورہ تنکی آ انکوائری کمیشن ءِ مسہ ہفتہ پین تننگ نا منظوری ءِ تس۔ کابینہ پاک عرب ریفائنری بورڈ آف ڈائریکٹرز نا اول سر ٹہیفنگ نا تشکیل نا ہم منظوری ءِ تس۔