طبی و ایلو المی آ گڑاتا فراوانی کن 40ملین ڈالر جاری کننگانے، جہانی بینک

اسلام آباد (اے پی پی) پاکستان اٹی جہانی بینک انا کنٹری ڈائریکٹر الانگوپیچوموتو پارینے کہ کورونانا دین انا مریس معیاد زہم آتون مون تننگ کن جہانی بینک پاکستان نا بنجائی و صوبائی حکومت آتون اواری اٹ خڑکی کاریم کننگ ئِ۔ راجی رابطہ نا ویب سائٹ ٹوئٹر آ جاری مروک آ اسہ کلہو اٹی اوپارے کہ کورونا وائرس نا جہانی دین انا رداٹ پاکستان اٹی روزگار نا رکھ اکن جہانی بینک بنجائی و صوبائی حکومت آتون اواری اٹ کاریم کننگ ئِ۔ اوپارے کہ پوسکن آ ٹیکنالوجی نا کمک اٹ چناتے تعلیم نا فراوانی تون اوار اوار جہانی بینک اسہ ہفتہ نا مد اٹ مچ آ ملک اٹی طبی و ایلو المی آگڑاتا فراوانی کن مست آن برجا ڈٹ آتیان 40ملین ڈالرنا زر جاری کرینے۔ اوپارے کہ مچ آ ملک اٹی کورونا وائرس تون فرنٹ لائن آ جنگ تروک آ طبی عملہ و کمکی کارندہ غاتے المی رکھی لویس نا فراوانی کن بینک کمک کننگ ئِ۔ جہانی بینک انا کنٹری ڈائریکٹر پارے کہ دوشنبے اسکان ملک انا چندی بشخ آتے ٹی 18لکھ رکھی کٹس، المی طبی ازباب، وینٹی لیٹرز، ایکسرامشین و الٹراساو¿نڈ مشین تا فراوانی ئِ عمل اٹ اتنگانے۔