شار انا سفا تخنگ کن پوسکن ءُ مکینزم اسے نا رد اٹ کاریم کننگے، کمشنر کوئٹہ

کوئٹہ : کمشنر کوئٹہ ڈویژن سہیل الرحمن بلوچ نا کماشی ٹی شار اٹ سفائی، تجاوزات و ایلو ویل آتا ایسری نا بابت اٹ اسہ جاچ ہلوک دیوان اس اڈ ہلک۔ دیوان اٹ ایڈیشنل کمشنر کوئٹہ ڈویڑن سعید احمد دمڑ، ایڈمنسٹریٹر میٹرو پولیٹن کارپوریشن کوئٹہ طارق جاوید مینگل، ڈپٹی کمشنر کوئٹہ، اسسٹنٹ کمشنر پولیٹیکل کوئٹہ ڈویژن بابر خان، اسسٹنٹ کمشنر ریونیو کویٹہ ڈویڑن آن بیدس ایس پی ٹریفک کوئٹہ ملک جاوید، چیف میٹرو پولیٹن عطاء اللہ بلوچ تون اوار ایلو افسرک ہم ساڑی ئسر۔ دیوان اٹ کوئٹہ شار اٹ ٹریفک نا ویل، سفائی و تجاوزات آت ایسری نا بابت اٹ گام گیج نا جاچ ءِ ہلنگا۔ او وخت آ شار اٹ سفائی، کچرہ غاتے ہرفنگ آن بیدس دے و نن نا وخت اٹ سفائی نا کاریم کننگک۔ و ٹریفک ویل آتا ایسری کن جتا جتا جاگہ غاتیا پارکنگ کننگ و عارضی لوکل بس اسٹینڈ کن جاگہ اس جتا کننگ کن جتا جتا سلاہ تیا سجفنگا۔ دیوان اٹ پارت کننگا کہ شار انا اختہ انگا شاہراہ تیا جوائنٹ روڈ و ائیر پورٹ روڈ آ ریڑھی والا تیکن جاگہ جوڑ کننگانے۔ وخت اس کہ روڈ آ ریڑھی تے سلفوک آتا برخلاف کارروائی کننگک۔ ایلو کنڈآ شار اٹ سفائی نا حالیت ءِ پین جوان کننگ کن پوسکن ءُ میکانزم اسے نا رداٹ کاریم کننگے۔ کمشنر کوئٹہ ڈویژن پارینے کہ شار اٹ ریڑھی والا تا سوب آن گیشتری ٹریفک نا بندی نا ویل آک ودی مریرہ وخت اس کہ اختہ انگا وخت و روچہ ٹی ویل آک پین ودرہ۔ شار اٹ جوڑ انگا پبلک ٹوائلٹس آتا جوانی و پوسکن آ ٹوائلٹ آتے جوڑ کننگ کن گام گیج کننگے و سفائی نا حالیت ءِ جوانی کن ہڑدے آن بیدس سال تا سے تموک آ کچرہ غاتے ہرفنگے۔

(آن لائن)