تعلیم یافتہ ءُ بلوچستان اسے آن شوندار ءُ بلوچستان اس جوڑ مریک‘نصیب اللہ شاہوانی

کوئٹہ : منتظم صوبہ جمعیت طلبہ عربیہ بلوچستان نصیب اللہ شاہوانی  پارینے کہ تعلیم یافتہ ءُ بلوچستان اسے آن شونداری ءُ بلوچستان اس جوڑ مریک۔ ورنا دینی وعصری تعلیم آ توجہ ایتر۔ الحمداللہ داسہ مدرسہ غاتیٹی دینی وعصری ہڑتوم آ علم آتے خوانفنگک۔ بلوچستان نا ہچ ءُ چنا اس داسہ تعلیمی خرچہ غاک یا غریبی نا سوب آن تعلیم آن محروم مفک۔ جمعیت طلبہ عربیہ بلوچستان اوفتے مدرسہ غاتیٹی مفت تعلیم ترفک۔ دافتا قیام و طعام نا فری بست و بند ءِ کننگک۔ بلوچستان نا اُلس تینا چناتے ساڑی دینی مدرسہ غاتیٹی داخل کیر تانکہ جہالت، تعصب نفرت نا ایسری و تعلیم نا کمک اٹ شونداری و امن انا کسر کشک۔ دا خیال آتا درشانی ءِ او جمعیت طلباء عربیہ نا داخلہ مدارس مہم نا چر اٹ دود و دیوان اسے آن تران کرسا کرے۔ او پارینے کہ پاکستان اٹ 60ملین آن زیات بندغ نا خوانندہ و تعلیم آن زہمی ءُ۔ دا داخلہ مدرسہ مہم نا کمک اٹ چناتا بھلو کچ اس ساڑی مدرسہ غاتیٹی داخل کرفنگک۔ ہراڑے او فرقہ واریت آن پاک ءُ چاگڑد اسے ٹی دینی تعلیم تون اوار اوار ساڑی  عصری تعلیم ہم مفت دوئی کیک۔ اوفتے اعلیٰ تعلیم نا دوئی کننگ کن ہر وڑ نا آسراتی فراوان کننگک۔ دا مہم ءِ پک کننگ کن جھگی تیٹی رہنگوک آ چنا، اُرا، ورکشاپ و دکان تیٹی مزوری کروک آ چناتا لمہ باوہ غاتیان ننا ٹیمک اوڑدہی کیرہ۔

(آن لائن)