دہشتگردی واقعہ غاک فورس آتا جیرت ءِ کم کننگ کپسہ، قدوس بزنجو

کوئٹہ : وزیراعلیٰ بلوچستان میر عبدالقدوس بزنجو ضلع کچھی ٹی لیویز پوسٹ آ دہشت گرد جلہو نا مذمت ءِکرسا پارینے کہ دہشت گرد آتا سم کاری آن اسہ لیویز کارندہ اسے نا شہیدی آ ڈکھیائی و است ہسونی نا درشانی ءِ کرسا شہید کارندہ نا خاہو ت تون ہڑزخواہی و ہمدردی نا درشانی ءِ کرینے۔ داڑے جاری مروک اسہ بیان اسے ٹی وزیراعلیٰ پارے کہ لغوری نا کارروائی تے اٹ فورس آتے شیف شاغنگ مفک، فورس آتا حوصلہ بلند و عزم سوگو ءِ۔ وزیراعلیٰ پارے کہ دہشت گرد آتے اوفتا ایسر اسکان سرکینہ۔ وزیراعلیٰ شہید نا درجہ غاتا بڑزی و خاہوت کن صبر وجمیل نا دعاکرے۔ یات سلے کہ تدوک آ دے بولان نا علاقہ ٹی لیویز چوکی آ دہشت گرد آتا جلہو اٹی اسہ لیویز کارندہ اس شہید مس۔ لیویز نا رداٹ تدوک آ نن بولان نا علاقہ بالاناڑی ٹی نادرست دہشت گرد آک لیویز چوکی آ سم کاری کریر ہراٹی اسہ لیویز کارندہ اس خالد احمد کرد شہید مس۔ لیویز نا ورندی کارروائی آن پد دہشت گرد آک نرنگ اٹ سرسہب مسر۔ لیویز لاش ءِ ہسپتال آ سرکرسا المی کارروائی آن پد اودے اوفتا خواجہ غاتا دوٹی تس۔ واقعہ غان پد لیویز و سیکورٹی فورس آک علاقہ ءِ گھیڑ اٹی ہلسا دوبہ دار آتا دزگیری کن سرچ آپریشن نا بناءِ کریر۔

(اے پی پی)