فودا چوہدری نا جسمانی ریمانڈ مسترد، جوڈیشل ریمانڈ نا پرمان

اسلام آباد: الیکشن کمیشن نا برخلاف خار تالان کننگ نا کیس اٹی عدالت فواد چوہدری ءِ جوڈیشل ریمانڈ آ اڈیالہ جیل آ راہی کننگ نا پرمان کرینے، جوڈیشل مجسٹریٹ وقاص احمد راجہ رکھوک فیصلہ ءِ بنفے، ہراٹی عدالت پولیس نا پین جسمانی ریمانڈ نا خواست ءِ مسترد کرے۔ ڈسٹرکٹ اینڈ سیشن کورٹ اسلام آباد اٹی الیکشن کمیشن باسک آتے دھڑکو تننگ نا بابت کیس اٹی پی ٹی آئی راہشون فواد چوہدری ءِ پیش کننگا، ہراڑے پراسیکیوٹر نا کنڈ آن پی ٹی آئی راہشون فوادچوہدری نا پین جسمانی ریمانڈ نا خواست کننگا۔ سماعت نا وخت آ پراسیکیوٹر پارے کہ پی ٹی آئی راہشون فواد چوہدری نا وائس میچنگ مسنے، فوٹو گرامیڑک ٹیسٹ لاہور آن کرفوئی ءِ، داڑکن پین جسمانی ریمانڈ درکار ءِ۔ فواد چوہدری آئینی ادارہ نا برخلاف خار ودی کننگ اٹی ءِ، بیان آن خار ودی مننگ اٹی ءِ۔ بیان آن الیکشن کمیشن نا ورکر آتے جان نا خلیس ہرفینے، فواد چوہدری کیس نا پین پرسجو کن جسمانی ریمانڈ المی ءِ۔ پراسیکیوشن نا کنڈ آن شہبازگِل کیس نا ہم حوالہ تننگا۔ پرسجوئی افسر پارے کہ نن نا 12 بجہ غا ریمانڈ رسینگا، اوتم اسکان اسہ دے چٹاسس۔ عملی وڑ اٹ ننے اسہ دے نا ریمانڈ ملانے، داسہ پین ریمانڈ تننگے۔ الیکشن کمیشن نا وکیل پارے کہ فواد چوہدری نا بیان ریکارڈ آٹے، فواد چوہدری تینا تران نا قرار ءِ ہم کرینے، تران آ تو ہچ ءُ اعتراض اس مننگ کتو، دوبہ دار بیان ءِ منانے۔ فواد چوہدری حکومت آ دوبہ خلکنے، الیکشن کمیشن ءِ حکومت نا منشی پارینے۔ فواد چوہدری پارے کہ الیکشن کمیشن نا ملازم آتا اُرا تسکان کانہ، الیکشن کمیشن نا کڑدار بروک آ منہ تُو بہت اہم ءِ۔ الیکشن کمیشن نا کاریم کرپشن ءِ چٹفنگ ءِ، ولے فواد چوہدری پریشر ودفنگ ءِ۔ الیکشن کمیشن ءِ اسہ کنڈ کننگ انگ ءِ۔ فواد چوہدری سنیئر ءُ سیاستدان اسے، ولے کانود آن ودیک کس اس ہم اف۔ فواد چوہدری نا اُرا نا تلاشی ہلنگ بھاز المی ءِ۔ فواد چوہدری نا اُرا غان لیپ ٹاپ و موبائل اونا ساڑی گری ٹی ہرفنگ المی ءِ۔ فواد چوہدری نا بیان اٹی ایلو بندغ آک ہم اوار اریر۔

(آن لائن)