ارّفَک چوری سے آن

در در انا بیوسی ءِ ارفک چوری سے آن

لمہ و باوہ نا کمی ءِ ارفَک چوری سے آن

اخہ اودے تیرہ تکلیف ملپک کپ اس ارغ

کیک برداشت لنگڑی ءِ ارفَک چوری سے آن

پٹک او خاچنگ کن تینا ملے کھڈی اس باسن ءُ

ہر اُرا اوڑا کڑی ءِ ارفَک چوری سے آن

بڈ کیک او چوچہ غاتا جی و جان اٹ ہیت کیک

وا ہم اوڑتون ظالمی ءِ ارفَک چوری سے آن

دیر تون ہیت اس است انا کے دیر اونا ہیت ءِ بنک

دیر کیک اونا سنگتی ءِ ارفَک چوری سے آن

تخپک اونا کاٹم آ دو ءِ کس اس مہر انا

دا وڑ اٹ تولنگ چُپی ءِ ارفَک چوری سے آن

خاچک اونا تغ تے ٹی اُف آڑسندہ ارے

خنتنے دے اس خوشی ءِ ارفَک چوری سے آن

کل چناک گوازی کیرہ چرپ اریر سنگار اریر

تپک او انتئے گوازی ءِ ارفَک چوری سے آن

دُوک مچ آ پوتڑو پاٹ پرغک شار اکن

ہوغپہ بزدل بہادری ءِ ارفَک چوری سے آن

نت شپاد پچ آک تے ریڑ ریڑ کاٹم آتے ٹوپ اف

ہیل کرینے دیر آن جی ءِ ارفَک چوری سے آن

ہوغنگ اٹ حال ءِ تینا تین تون تینٹ کیک بیان

بند کرینے بادوی ءِ ارفَک چوری سے آن

لکھ شکر اللہ کنا انت اس کہ کنے آ ایسنس

نی اسہ دے بینگنی ءِ ارفَک چوری سے آن

دین نماز تبلیغ حج اٹ جنت ءِ نی خنپروس

رب انا کر بندگی ءِ ارفَک چوری سے آن

دامون ایمون خاخر آکءُ لیپ اٹی نن لڑزنہ

یخ ءِ یا کہ باسنی ءِ ارفَک چوری سے آن

کے گلہ دیر تون شکوہ معصوم تینا حال انا

گنگ کرینے بادوی ءِ ارفَک چوری سے آن

لمہ باوہ نا او مہر ءِ پٹنگ ءِ خلق خلق اٹی

انت اونا زندگی ءِ ارفَک چوری سے آن

شاعری نا خنجری داسہ مچٹ دوست بریک

داسکان ہیل کر شاعری ءِ ارفَک چوری سے آن

ہفتئی تلار،

تاک26

04 July 2020

پنہ، 3