انگلینڈ نا برخلاف مسٹمیکو ٹیسٹ‘ پاکستانی ٹیم نا کمک آ پِر بس

لاہور (مانیٹرنگ ڈیسک) انگلینڈ نا برخلاف سیریز نا مسٹمیکو ٹیسٹ میچ اٹ ڈائی نا خلیس نا گواچی مروک آ پاکستانی ٹیم نا کمک کن پِر بسنے او میچ نا پنچمیکو دے ہم پِر نا سوب آن گوازی متو۔ پاکستان او انگلینڈ نا نیام اٹ مروک آ سیریز نا مسٹمیکو ٹیسٹ میچ نا پنچمیکو دے پِر نا سوب آن دا وخت اسکان گوازی بنا متو۔ ساؤتھ ہیمپٹن اٹ مروک آ میچ اٹ انگلینڈ زیک کرالی او جوز بٹلر نا جوان انگا پارٹنر شپ او گچین آ بیٹنگ نا سوب آن 8 وکٹ نا نسخان آ 583 رنز جوڑ کرسا ڈائی ءِ ڈکلیئر کریسُس۔ اولیکو سنچری جوڑ کروک آ کرالی 267رنز نا ڈائی اس گوازی کریسُس وخت اس کہ جوز بٹلر 152رنز جوڑ کرے۔ ورندی ٹی کیپٹن اظہر علی نا گچین آ 141 رنز نا گچین آ ڈائی آن پد پاکستانی ٹیم 273 جوڑ کرسا آؤٹ مسوسُس۔ انگلینڈ نا کنڈآن جیمز اینڈرسن 5وکٹ ہلسا کل آن گچین آ گوازی گر مسوسُس۔ انگلینڈ 310 رنز آتے خنسا پاکستان ءِ فالو آن کرفے۔ پاکستان ارٹمیکو ڈائی ءِ بنا کرے تو اوپنرک 49رنز نا بنا اس تسر ولے او وخت آ شان مسعود ایل بی ڈبلیو مرسا آؤٹ مس۔ اسکور 88 اسکان سر مس تو ارٹمیکو اوپنر عابد علی نا ڈائی ہم 42 آ ایسر مس۔ ہراتم میچ نا چارمیکو دے انا گوازی ایسری آ سر مس تو پاکستان ارا وکٹ نا نسخان آ 100 رنز جوڑ کریسُس او ڈائی نا بے سہبی آن بچنگ کن پین 210 رنز درکار ئسر۔ میچ نا پنچمیکو دے نن نیمہ اسکان مروک آ پِر نا سوب آن پِر پالُن مننگ نا سوب آن دا وخت گوازی متو۔ میچ اٹ پِر پاکستان کن کمکار گوندنگانے او دا وخت اسکان اینو نا دے انا کیہی اوور تا گوازی ہم ضائع مسنے وخت اس کہ پاکستان ءِ میچ ءِ بچفنگ کن 50-60 اوور نا بیٹنگ کروئی ئس۔