جِک جواب

نفسیاتی مرض:۔

٭ای براہوئی زبان و ادب نا اِرا ایم فل اسکالر تو ن تولوک ئسُّٹ، دا ہڑتوم آک براہوئی ادب و نفسیات نا بابت تین  پہ تین ہیت و گپ کننگ ئسُر۔ اوفتا ہر ارٹمیکو ہیت انگریزی ٹی ئس، کنے ہم اُست وار تتو ای ہم ہیت اس کننگ خواہسٹہ۔ ای ہکل کریٹ ”یار۔۔! دُن ہم مننگ کیک کہ۔۔۔؟“

داسکان کنا ہیت برجا ئس کہ او کنے آ ہُرسا بشخندہ کریر۔ کنا برجا غا ہیت ء ِ کنا  با غان جپسا پاریر ”مگہ نی ننا ہیت آتے پُہہ مننگ اُس۔

ہاں۔۔۔! نن انت پاننگ اُن۔۔؟“

ای ہندا سرپند مسٹ کہ نن احساس برتری نا نفسیاتی مرض اٹی اختہ اُن، ہراکہ احساس کمتری نا ایلو پن ء ِ۔

ای شاعری بِننگ کن بتنُٹ:۔

٭براہوئی زبان نا شاعر شاکر ندیم  تینا اسہ کاریم اسے ٹی براہوئی زبان نا پروفیسر اسے آ بلوچستان یونیورسٹی آ ہنا۔

جوڑ بڑ کننگ آن پد پروفیسر پارے ”شاکرجان! ای داسہ مچے اختہ اُٹ نی جَٹ اسے آن پد بر، ای شاعری بنفوٹ۔“ شاکرندیم پارے ”ای نے آ شاعری بِننگ کن بتنُٹ، کنے نے تون پین کاریم اسے، اگہ کنے شاعری بنوئی مرے تو ای حیدر حسرت آ کاوہ، نے آ بفرہ۔“

نی نثر لکھس تو،جوان ء ِ:۔

٭ اسہ مشاعرہ اسے ٹی براہوئی زبان نا پروفیسر اس تینا شاعری ء ِ بنفے۔ تو اسہ ورنا ء ُ شاعر اس پروفیسر آ دُو تفے پارے۔

”پروفیسرصاحب۔۔۔!  شاعری  نے آن تیر ء ِ، نی نثر لکھس تو جوان ء ِ۔“

ناک بہنا کن صحیح ء ِ:۔

٭ براہوئی زبان نا لیکچرار استاد اس حسن ناصر ء ِ سلاہ ترسا پارے۔

نا چُنا ء ِ زکام ء ِ تو فلانی دوائی (شربت) ء ِ ہل/ او  ”ناک بہنا کن صحیح ء ِ“

قصاب:۔

٭  براہوئی زبان نا افسانہ نگار حسن ناصر نا ڈیوٹی انٹر بوائزکالج کانک اٹی ء ِ۔ اسہ دے اس عبدالحیات منصور ابابکی حسن ناصر آن ارّفے کہ ”نما ڈیوٹی ہراڑے کنے۔۔؟“ حسن ناصر پارے ”کنا ڈیوٹی انٹر کالج کانک اٹی  ء ِ۔“ عبدالحیات منصور ابابکی پارے ”کانک اٹی عبدالقادر ء ِ درست کیسہ۔۔۔؟“ حسن ناصر سوچ خلک پارے ”جی  نہ اودے درست کپرہ۔“ حیات منصور پارے ”نی امر ء ُ ادیب اسے اُس کہ قادر ء ِ درست کپیسہ۔“ حسن ناصر  اوڑان سوج کرے کہ ”قادر  دیر اسے؟ کانک اٹی انت کاریم کیک۔۔؟“ حیات منصور ہکل کرے پارے ”او ہموڑے قصاب ء ِ۔“ حسن پارے ”ای کانک کالج اٹی خوانفوہ قصابی کپرہ۔“

حمیدعزیزآبادی کُرد اسے:۔

٭براہوئی زبان نا شاعر صابر وحید ء ِ اسٹ اس پارے ”حمیدعزیزآبادی کُرد اسے؟“ صابر وحید پارے ”آخا بابا او سمالاڑی اسے۔ نی ہراکان بِنگُنس کہ او کرد اسے۔۔؟“ تو ہمو بندغ پارے ”ہلہ او میر عبدالعزیز کُرد ء ِ تینا شاعری ٹی انتئے نازیفک۔“ صابروحید پارے ”او نیلسن منڈیلا نا بارو اٹ ہم شاعری کرینے گُڑا او افریقی اسے۔“