حضرت نوح ؑآن حضرت ابراہیم ؑاسکان  1

نسل آدم اٹی پنی ءُ نوحؑ نبی اس مسنے

او ہم اللہ نا اَسٹی نا گواہی تسنے

قوم گمراہ ئس اونا رب آن ئسک بے چکار

منتو اللہ ءِ وخت اس مس غضب نا او شکار

دِیر اتو دنیا ءِ اللہ اوتم آ دُن غرق کرے

ہر بروک آ ءِ نوا کہ بس زرس عبرت مرے

نوح انا رند آن پدا دُن نسل آدم مس شروع

بندغ و شیطان نا نیام اٹ چِک تاڑ ہم مس شروع

وا خناس نی تِس شیطان بندغ آتے دُن خطا

ذات باری نا عنایت مس وا انسان آ پدا

دن نبؑی تا کاروان اٹ نا مدار آ بس خلؑیل

قدرت اٹ اللہ نا اوڑے مس شیطان وا ذلیل

بُت پرستی جاہلی ٹی قوم اونا ئس پِنی

رب انا حُکم اٹ ہموتم مس عراق اٹ اؑو ودی

باوہ تے آزر پنی آ بُت تراش اس ئسکہ

در کرک سودا نی داتے او خلیل ءِ تسکہ

پارے باوہ دا بُت آک ہم دُو انا محتاج اریر

دافک تینٹ منڈو ٹُنڈ ءُ دِنّا وار آ سر مریر

دے و توبے یا کہ اِستارک انت مرورک دُن خدا

ای امر منوٹ دافتے کی ہلِنگور دم دم آ

ای خدا چاوہ اسٹ ءِ لا شریک و لا مکان

دے توبے کل جہانک ءُ جوڑ اونا قدرت آن

مشرک آتا دین ءِ اینو تپرہ ہچ تپروٹ

کفر انا دُن ای بُت آتے پا امر وا پرغپروٹ

رب مون تِس ای نبی اُٹ قوم اکن دا جاہل آ

بیدس اوڑان اف کس اس پین پابو زو اس لا اِلا

قوم اتون نمرود آ وخت اس دعوت ءِ دا سر کرے

بادشاہ تو قوم باوہ نا گمان آ خَر کرے

ہفتئی تلار،

تاک26

04 July 2020

پنہ، 4