پینشن نانظام اٹ بھلو کچ اسے ٹی اصلاحات کننگ نا گرج ءِ‘اسحاق ڈار

اسلام آباد :  بنجائی وزیرخزانہ سینیٹر اسحاق ڈار پارینے کہ ملک اٹ پینشن نانظام اٹ بھلو کچ اسے ٹی اصلاحات کننگ نا گرج ءِ‘ننا سال انا 8 سَد ارب روپئی بیرہ پنشن تننگ آ خڑچ مریک‘ ملک انا جم مجبوری ناسوب آن سخت ءُ فیصلہ کروئی تمنگ ءِ‘ کشت وکشار نابشخ نن کن بھاز اہم ءِ بیرہ درآمدی ڈی اے پی آ سبسڈی ءِ چٹیفینن۔ دا خیال آتادرشانی ءِ او یک شنبے نادے قومی اسمبلی نا دیوان اٹ کرے‘ قومی اسمبلی نا دیوان اسپیکر قومی اسمبلی راجہ پرویز اشرف ناکماشی ٹی اڈہلک‘ بنجائی وزیر خزانہ سینیٹر اسحاق ڈار پارینے کہ ننا سال انا 800 ارب روپئی پنشن تننگ آ خڑچ مریک‘ ننے پنشن نا بابت اصلاحات کروئی تمک و نن دانا بناءِ کرینن نہ تو نن کن دا سگ آن پیشن ءُ گڑاس مریک‘ بایدے نن پنشن فنڈ انا بابت لائحہ عمل پک کین‘ اسمبلی نا باسک غوث بخش مہر پارے کہ کشت وکشار نابشخ بھاز اہم ءِ‘ کھد انا سبسڈی ءِ چٹفنگ آن دا پین بھس مریک‘ مچ آدنیا سبسڈی تننگ اٹی ءِ بایدے نن دادے چٹفپن‘ بنجائی وزیر آبی وسیلہ خورشید شاہ پارے کہ اسہ فیکٹری اس چلیفنگ کن ملک انا مخ ءِ ژند کننگ عقلمندی اس اف ہمو فیکٹری ءِ بند کننگے کشت وکشار نا بشخ ءِ بھس کننگپ‘ دا بیدادی کننگپ۔ وزیر خزانہ اسحاق ڈار پارے کہ ڈی اے پی کھد پاکستان اٹ تیار مننگ اٹی ءِ دا کمپنی ٹی پین اِرا سَد ڈالر نا زرکاری کننگ کن امنائی درشان کننگانے‘ اگہ گرج آک ملک اٹ پورو مسر تو پیشن آن خواہفنگ ناگرج مفک‘ سبسڈی ءِ درآمدی ڈی اے پی آ چٹفنگانے‘ آئی ایم ایف پروگرام نا 9 میکو ریویو ہم ارے‘ ملک انا جم مجبوری ناسوب آن مچٹ گام گیج کروئی تمنگ ءِ‘ داکان گڈ اسیجا تولسا ایسر اس کشنہ۔ بنجائی وزیر مولانا اسعد محمود پارے کہ فاٹا نا انضمام نا وخت آ دَہ سال انا پیکیج ناپڑو کننگاسس ہرانا رد اٹ پنچ سال اکن ٹیکس تیان خلاسی تننگاسس‘ نن کابینہ ٹی ہم خواست کرین کہ پین سال اس رعایت تننگے ولے داسہ اوفتیان گدرینگوک آ پنچ سال انا ٹیکس ءِ ہم خواہنگ انگ ءِ‘ تانکہ حکومت کل قول تے پورو کپک ہمو وخت اسکان فاٹا ءِ تروک کل آسراتی تے برجا تخنگے‘ فاٹا ٹی ریفرنڈم کرفسا ہمو جاگہ ناالس آن ارفنگے کہ او انت خوارہ۔ او پارے کہ کنا وزارت نا بابت اسہ باسک اس تحریک استحقاق جمع کرفینے اونا انت کہ فیصلہ برے اودے ایوان اٹ اتنگے دا انتظامی ءُ باندات اسے دادے سیاسی جوڑ کننگپ‘ نن اسہ سال اٹ تینا وزارت نا اِرا ہزار کنٹریکٹ ملازم ءِ پکا کرین۔

(آن لائن)