اسسٹنٹ کمشنر کوہلو عبدالستار مینگل نا کماشی ٹی پرائس کنٹرول کمیٹی نا دیوان

کوئٹہ (اے پی پی) اسسٹنٹ کمشنر کوہلو عبدالستار مینگل نا کماشی ٹی پرائس کنٹرول کمیٹی نا دیوان اس اڈ ہلک۔ دیوان اٹی پرائس کنٹرول کمیٹی، ضلعی آفیسر و پوریاگربرداری بشخ ہلکر۔ داوخت آ چندی کنوئی آ گڑاتا نہاد آتا جاچ ءِ ہلنگا و پوریا گر برادری نا سلابت اٹ پوسکن ءُ ریٹ لسٹ اس ترتیب تننگا۔ ہراٹی ایٹ انا سُو، ککڑ، پٹاٹہ، ٹماٹر، پیماز، نت، دال، چھولے، خیسن آ دال و ایلو کنوئی آ گڑاتا نرخنامہ اس مقرر کننگا۔ اسسٹنٹ کمشنر عبدالستار مینگل دیوان آن تران کرسا پارے کہ بے آب اٹ کنوئی آ گڑاتا بہاکروک آ دوکاندار تا برخلاف سخت کارروائی کننگک منہ پیسہ غاتا خاطر الس نا جان جوڑی تون گوازی کننگ نا موکل ہچ کس ءِ تفنہ، کنوئی آ گڑاتا آب و مقدار آ سمجھوتہ کپنہ، پوریاگر برادری ءِ مرے کہ او جان دراخی رکھ انا اصول آتا رداٹ کنوئی آ گڑاتے بہاکیر، و دوکان وہوٹل آتے ٹی سفائی نا خاص خیال ءِ تخنگے۔ اسسٹنٹ کمشنر مستی پارے کہ شاری تے مرے کہ او کٹیا خورو ملاوٹ کروک آتا پیدواری ءِ کیر تانکہ اوفتا برخلاف کارورائی کننگ مرے۔ چیک اینڈ بیلنس تخنگ کن مچ آ شار انا بیکری ، ہوٹل و دوکان تیٹی چھاپہ خلنگک وخت اس کہ سادہ انگا لویس اٹ لیویز کارندہ غاک کٹیا خور و ملاوٹ کروک آتیا سخت نظر تخر۔