کشمیر اٹ برجا بھارتی بیداد نا ہر فورم آ مزاحمت ءِ کینہ، پاکستان
بھارت نا کانود آن چَپ کوزہ گری ٹی جموں وکشمیر اٹی انسانی حق انا خلاف ورزی تیا مدام توار چست کرسا ہنان، مونی ہم ہندن کینہ
اسلام آباد : پاکستان پارینے کہ او بھارت نا غیرکانودی کوزہ ٹی جموں وکشمیر اٹی انسانی حق انا پدریسہ و سنگین خلاف ورزی تیا توار بڑز کرسا کیک و او اقوام متحدہ نا سلامتی کونسل نا تعلقدارقرارداد آتا رداٹ حق خودارادیت نا دوئی کننگ کن جموں وکشمیر نا الس نا بے پرخ اخلاقی، سیاسی و سفارتی مخ تفی ءِ برجاتخک۔ دفترخارجہ نا ترجمان ممتاز زہرا بلوچ پنچ شنبے نادے آ ہفتہ وار پریس حوال اٹی پارے کہ 1990 نا دہائی نا آخیریکو دہ دے اٹی بھارتی کوزہ گیر فوج جموں وکشمیر اٹی کشت وخون نا مسہ بھلا واقعہ غاتا زموار ئس۔ اوپارے کہ 21 جنوری 1990 آ سری نگر نا علاقہ گاؤ کدل اٹی بھارتی فوجیک پرامن مچی تیا سم کاری کرسا 50 شاری ءِ شہید و چندی تے ٹھپی کریر، 25 جنوری 1990 آ ہندواڑہ نا خلق اٹی بھارتی فوجی پین 21 کودک کشمیری تے کسفیر وخت اس کہ 27 جنوری 1994 آ بھارتی فوجیک کپواڑہ خلق اٹی 27 شاری تا کشت وخون ءِ کریسر۔ ترجمان پارے کہ زہمی و اوفتا خاہوت آک اینو اسکان انصاف نا چاری ءُ، دا گندہ انگا ڈوہ انا مرتکب بندغ آتا وخت اس ہم احتساب ءِ کننگتو۔ دفترخارجہ نا ترجمان پارے کہ اینو نن شہید آتے یات کینہ و اوفتا قربانی تے خراج عقیدت پیش کینہ۔ ترجمان پارے کہ وزیرخارجہ بلاول بھٹو زرداری اقتصادی کمکار تنظیم (ای سی او) کونسل آف منسٹرز نا 26 می دیوان اٹی بشخ ہلنگ کن 23 و 24 جنوری آ تاشقند نا دورہ ءِ کرے، او (ای سی او) نا وزارتی کونسل آن تینا تران اٹی واپار، زرکاری، رابطہ، سیل و سوات و اقتصادی شونداری کن باسک ملک آتا نیام اٹ مربوط علاقائی کمکاری نا اہمیت ءِ تالان کننگ آن بیدس علاقائی کمکاری ءِ ودفنگ کن واپاری پالیسی تے ہم گرنچ کننگ، سوگو انفراسٹرکچر نا جوڑ کننگ و گڑاو خذمت آتا آجو ہن و بر ءِ آسان کننگ آ زور شاغا۔ ترجمان پارے کہ وزیر خارجہ موسمیاتی بدلی نا سوب آن ودی مروک آ قدرتی آفت آتا چیلنج آتا بارواٹی ہم ہیت کرے۔ ممتاز زہرا بلوچ پارے کہ وزارتی دیوان نا اسہ اہم نتیجہ باکو آذربائیجان اٹی ای سی او ریسرچ سینٹر نا چارٹر آ معاہدہ ئس،دا مرکز ای سی او نا باسک ملک آتا نیام اٹ اقتصادی ویل آتیا مہارت و پٹ وپول نا شریداری ءِ مون آ دیک۔ اوپارے کہ وزراء کونسل نا دیوان نا وخت آ وزیرخارجہ بلاول بھٹو زرداری ایران، تاجکستان، ترکیہ نا وزرائے خارجہ و ازبکستان نا قائم مقام وزیر خارجہ تون اوڑدہی کرے۔ ترجمان پارے کہ پاکستان ای سی او تنظیم نا بانی باسک انا وڑاٹ اقتصادی کمکار تنظیم ءِ سوگو ہُننگ خواہک تانکہ علاقائی کمکاری ءِ پین گچین کننگ تون اوار اوار علاقائی واپار آ خصوصی چکار کننگ مرے۔ ترجمان پارے کہ متحدہ عرب امارات نا صدر شیخ محمد بن زید النہیان تدوک آ دے پاکستان نا نجی دورہ غا رحیم یار خان آ سرمس ہرادے بالی پٹ آ وزیراعظم محمد شہباز شریف بخیر کرے، اوڑدہی ٹی ہڑتوم آ راہشونک برادرانہ تعلقداری تے پین سوگو کننگ نا عزم انا درشانی ءِ کرے۔ اومستی پارے کہ روس انا خصوصی نمائندہ اوغانستان، سفیر ضمیر کابلوف ڈیہہ نا تینا دورہ نا اسہ بشخ اسے نا وڑاٹ ہندا ہفتہ پاکستان نا دورہ ءِ کرے، اووزیر مملکت خارجہ امور حنا ربانی کھر و خصوصی نمائندہ اوغانستان سفیر محمد صادق تون اوڑدہی کرے۔ دا اوڑدہی تیٹی اوغانستان نا حالیت و ڈیہہ نا ساڑی آ پیش رفت آ گپ وتران کریر۔ ترجمان پارے کہ پاکستان تینا ہمسایہ ٹی امن و سوگوی نا اہمیت آ زور شاغا۔ اوپارے کہ نن علاقائی ملک آتون اواری اٹ کاریم کننگ نا تینا است خواہی نا درشانی ءِ کرین تانکہ دہشت گردی نا مقابلہ ءِ کننگ و اوغانستان اٹی انسانی تنکی ءِ توننگ اٹ کمک کن عبوری اوغان حکومت تون پدریسہ وعملی گپ وتران ءِ مون آ دننگ مرے۔ اوپارے کہ ہڑتوم آ کنڈ آک اوغانستان اٹی امن، سوگوی و اقتصادی شونداری ءِ مون آ دننگ کن ہم گرنچی و کمکاری ءِ پین سوگو کننگ کن اواری اٹ کاریم کننگ نا تینا عزم انا درشانی ءِ کرسا ہڑتوم آ کنڈآتا و علاقائی فورم بشمول ماسکو فارمیٹ و اوغانستان نا ہمسایہ ملک آتا پلیٹ فارم نارداٹ گپ وتران ءِ برجاتخنگ آ ہم امنا کریر۔
(اے پی پی)