کشمیریک تہار دے اڈتننگ ءُ، مقبوضہ دامان اٹی رکھی گام گیج آک سخت

سرینگر /اسلام آباد :  کنٹرول لائن نا ہڑتوم آ کنڈ و مچ آ دنیا ٹی رہینگوک آ کشمیریک پنچ شنبے نادے آ بھارت نا یوم جمہوریہ ءِ تہار دے انا وڑاٹ اڈ تسر، تانکہ جہانی برادری آ زور شاغنگ مرے کہ او بھارت نا کنڈآن کشمیری الس ءِ حق خودارادیت تننگ آن پدریسہ انکار نا نوٹس ءِ ہلے۔ کشمیر میڈیا سروس نا رداٹ تہار دے اڈتننگ نا کال ءِ کل جماعتی حریت کانفرنس تسوسس۔ کوزہ گیر بھارتی انتظامیہ یوم جمہوریہ نا وخت آ مقبوضہ جموں وکشمیر اٹی رکھی گام گیج آتا پن آ چھاپہ و پٹنگ نا کارروائی تا چرجوئی ءِ ترند کرینو۔ سری نگر نا کرکٹ اسٹیڈیم، ہراڑے پن انا بھارتی یوم جمہوریہ نا بنجائی دود مننگ اٹی ءِ، نا کنڈآ ہنوک آ غٹ سڑک آتے خاردار تارتے اٹ سیل کننگاسس۔ بھارتی فوجی و پولیس کارندہ غاک سرینگر و مقبوضہ علاقہ نا ایلو شار و خلق آتا داخلی و خارجی کسرتیا گاڈی، مسافر و راہگیر آتا پٹنگ نا مہم ءِ ترند کرینو۔ کل جماعتی حریت کانفرنس نا راہشونک سرینگر اٹی جاری تینا بیان تیٹی پارینو کہ بھارت جمہوری ملک اس پاننگ نا اسُل حقدار اف انتئے کہ او کشمیری تا حق خودارادیت طاقت نا زور آ سلب کرینے۔ داکان بیدس بھارت نا پن انا یوم جمہوریہ نا وخت آ کل جماعتی حریت کانفرنس نا کال آ اسلام آباد اٹی بھارتی ہائی کمیشن نا مون آ برانزی مچی اس کننگا۔ مچی کروک آتیٹی اوورسیز کشمیری، حریت راہشون تتون اوار سیاسی راجی شاریک بشخ ہلکر۔ مچی کروک آتا دوتے ٹی مون انگا بیرک ہرفوک بھارتی سرکاری نا برخلاف و آجوئی نا حق اٹی فلک شگاف نعرہ خلکرہ۔ داوخت آ حریت راہشونک پاریر کہ بھارت پن انا یوم جمہوریہ نا پن آ تینا غیرکانودی کوزہ ٹی جموں و کشمیر اٹی شاری تا کشت وخون ءِ کننگ اٹی ءِ۔ مچ آ دنیا ٹی رہینگوک آ کشمیریک بھارت نا دہشت گرد دروشم ءِ بے پڑدہ کننگ ءُ، بھارت تینا غیرکانودی کوزہ ٹی جموں وکشمیر اٹی انسانی حق ءِ خلکنے، بھارت امر ءُ جمہوری ملک اسے ہراٹی کشمیری تیان اوفتا زند انا حق ءِ پُلنگانے۔

(اے پی پی)