زیباغا مکران ۔۔۔۔۔سیل و چکر۔۔۔۔۔۔(6)

یاسین بلوچ صاحب نا پدی بننگ آ نن تربت سول ہسپتال نا کنڈ آ ہنان، کہ سرکاری ہسپتال نا جاچ ءِ ہلنگ کین و اوڑے ناجوڑ آتیکن جان سلامتی نا آسراتی، خاص وڑ اٹ ہسپتال نا واکدار آتتون ملاقات مرے، و جان سلامتی نا بشخ اٹی نن ہراکاریم تے تربت شار اٹی کننگ خواہسنہ دا رد اٹ ننے راہشونی اس ملے۔

ڈاکٹر یوسف (ایم ایس تربت ہسپتال) تون اوڑدہی:۔

ننا رہینگوک آ جاگہ غان کیچ سول ہسپتال مچے بھاز 20 منٹ انا سفر آ ئس۔ کیچ شار انا ہرا بھلا بشخ آن نن گدرینگان اونا بارو اٹ پین جاگہ اس سرجم حوال تروٹ، ولے داسہ بیرہ ڈاکٹر یوسف بلوچ صاحب و اونا کماشی ٹی چلینگوک آ سرکاری ہسپتال نا بارو اٹ مچے پاو۔ راست ارفرے تو دا ہسپتال آن زیات اسہ ویگن آتا اسٹاپ اس لگنگ ئس۔ ہسپتال نا پیشن نا درگہ غا گاڈی تا ہِن و بر برجا ئس۔ مچے مون آ ہنان تو او پی ڈی و انتظار نا جاگہ غاتیا مخلوق نا بھلو کچ اس ساڑی ئس، ہرافتیٹی زیات کچ نیاڑی تا ئس۔ نن انتظامی بلاک نا پارہ غا ہنان اوڑے ہم بھاز مخلوق ئس۔ نن تون جئی آ سنگت آتیان اسٹ اس میڈیکل سپرنٹنڈنٹ (ایم ایس) صاحب نا کمرہ ٹی ہنا و ایم ایس نا ساڑی گری ٹی اودے ننا کڑد انا بارو اٹ پارے و بننگ نا موکل ہلک۔ ہراڑان ننے تہٹی توار کننگا۔ دفتر تے فراخ ئس، اسہ بھلو ٹیبل اسے نا مون آ دہ دوانزدہ بندغ نا تولنگ کن صوفہ تخوک ئسر۔ ڈاکٹر یوسف بلوچ بھاز جم و جوش اٹ ننے بخیر کرے، و تولنگ نا پارے۔ سرکاری آ دفتر آتیٹی لس وڑ اٹ کاریم آن بیزار بندغ آک ملرہ، ولے ڈاکٹر یوسف بلوچ صاحب نا معاملہ مچے جتا ئس، او اسہ سنجیدہ رعبدار و کاریم تون مہر کروک ءُ انسان اس لگا۔ ڈاکٹر صاحب تون نن تینا بننگ نا مسخت اٹ ہیت کرین و اونا سلاہ ءِ ہلکن۔ ہرا ڈائیگنوسٹک لیبارٹری ءِ نن ضلع کیچ اٹی جوڑ کننگ خواہسنہ ننے اندازہ ہم الو کہ ہرا پروجیکٹ نا بارو اٹ نن پنجگور ضلع ٹی و داسہ ننکان غلام یاسین بلوچ نا اُراٹی ہیت ءِ کننگ اٹی ئسن ڈاکٹر یوسف بلوچ صاحب اونا اہمیت و گرج انا بارواٹ ننے آن زیات معلومدار ئس، ہرا رش ہسپتال نا تہٹی چندی بشخ آتا پیشن آ خننگاکہ، دا رد اٹ ڈاکٹر یوسف بلوچ پاننگ ئس کہ اسہ دے اٹی کم و وَد ہزار ناجوڑ ہسپتال آبریرہ، مچ آ دے 4، 5 کلاک اٹی کل ڈاکٹر آک ہم داخس ناجوڑ ہُننگ کپسہ، و اگہ نیمہ غان ہم کم ناجوڑ تے کن لیبارٹری نا ٹیسٹ نوشتہ کینہ تو ہسپتال اٹی داخس ٹیسٹ انا آسراتی اف۔

ہندا سوب آن او مستی پارے کہ نم انت اس کیچ شار و ضلع نا بارو اٹ سوچانُرے بسنرے اوڑا عمل نا سخت گرج ءِ۔۔ و داڑتون اوار او تینا پارہ غان سرجم وڑاٹ کمک نا بابت ہم امنا کرے۔ ننا دا مجلس بھاز جوان مس۔ ای اودے Way notions fail پنی آ کتاب ءِ ٹیکی تسٹ، و اوڑان موکل کرین۔ کہ پین کاریم اس کننگ کین۔ ڈاکٹر صاحب آن موکل مننگ آن پد کنے ہسپتال نا تہٹی ناجوڑ آتا حالت ءِ خننگ آن دا اندازہ مس کہ زیات ناجوڑ آک مشکل اٹ او پی ڈی نا آسراتی دوئی کننگ کرور۔ انتئے کہ اوفک بھاز زیات ئسر اگہ اوفتیکن دِتر نا ٹیسٹ نوشتہ کننگاتو اوفک لیبارٹری ٹی مسہ چار ٹیسٹ رزلٹ دوئی کننگ کیرہ، و ولدا تینا جاچ ءِ ڈاکٹر آن کرفنگ کرور، و ہندا بارو اٹ ڈاکٹر یوسف بلوچ ننے تینا ہیت و گپ اٹی اشارہ کریسس کہ 10 بجہ غا سہب اتو ن ڈیوٹی آ حاضر مروک آ و سَے بجہ غا چھٹی کروک آ ڈاکٹر آک بھاز کم ءُ، و اوفک داخس ناجوڑ آتے ہننگ کپسہ۔ دا مچ آ حالیت آ کنے بھاز ڈکھیائی مس و اُست بڈی ہم مس کہ نن مکران کن ہرا خیر انا کاریم اسے نا سوچنگ اٹی ئسن اونا دا ضلع ءِ بھاز گرج ءِ۔

داڑسکان تو ہیت مس سول ہسپتال کیچ انا، داسہ دا ہم پاو کہ ہسپتال اٹی داخس رش انا سوب انت ءِ، و دا بندغ آک دیر ءُ، و دافک ہراکان ہراکان گاڈی کرا اٹ ہلسا سہب اتون وختی ہسپتال آ سر مریرہ۔ دا مچ آ ندارہ نا پد اٹ ضلع کیچ ءِ پہہ مروئی مریک تو ببو کہ مچے دا ضلع نا بارو اٹ گڑاس پان کہ نما دا سفر خشک مف۔

ضلع کیچ:۔

1977ء اٹی ہراتم مکران ءِ ڈویژن نا حیثیت تننگا تو تربت نا سرکاری پن کیچ تخنگا۔ دا اسہ تاریخی و متکن ءُ بھلو ڈغار اسے آ تالان علاقہ اسے، ہرانا آبادی 2017ء نا مردم شماری نا رد اٹ 9 لکھ آن زیات پاننگانے۔ داٹی شش تحصیل ءُ، ہرافیٹی بلیدہ، زامران، تربت، مند، تمپ، ملک آباد و دشت اوار ءُ۔ دا ضلع ءِ بھلو وخت اسے آن مرکزیت دوئی ءِ۔ تربت شار داسہ ہم ڈویژنل ہیڈ کوارٹر ءِ، و گدرینگوک آ وخت اٹی ہم دا شارءِ مرکزیت دوئی مسنے۔ داضلع نا دے ٹک و قبلہ قطب و سویل اٹی سد آ کلومیٹر سفر کننگے ہم دا ایسر مفک۔

تربت شار انا قطب نا پارہ غا تحصیل بلیدہ ءِ۔ دا جاگہ نا بھازی مخلوق بلیدیک ءُ، ہرافک مست زمانہ ٹی مکران نا حکمران آک مسنو۔ قطب قبلہ ٹی زامران تحصیل ءِ، ہرا اسُل خلقی ءُ علاقہ اسے۔ بھاز زیبدار و اُست ءِ چکوک ءُ خلق اسے۔ دا جاگہ نا مخلوق مچے ضدی و جنگوڑو تَب ہم ارے۔ نوزدہ میکو کرن اٹی ہراتم مکران نا چندی علاقہ غاتیا ٹیکس خلنگا تو زامران نا بندغ آک ٹیکس تننگ آن نمن مسر و اسہ بھلو جنگ اس کریر، ہراٹی وخت انا حکومت مات کنگ۔

تربت شار آن اگہ قطب نا پارہ غا پدے ریسہ 150 کلو میٹر اسہ سڑک اسے آ سفر کننگے، تو کیچ انا ایلو تحصیل آک خننگ مریرہ، ہرافتا پنک تمپ، ملک آباد و مند ءُ۔ دا علاقہ غاک ہم قبائلی علاقہ ءُ۔۔ چندی قبیلہ غاک داڑے آبادءُ۔ الار نا باغک داڑے اریر۔

مندآن 25، 30 کلومیٹر نا مُری آ ایران تون سیم سر لگک، ہرادے ”ریدپک“ پارہ۔ داڑے مست چیک پوسٹ ئسر، ہراڑے مخلوق آن سوال و جواب مسکہ۔ ولے داسہ داڑے کھڈ ختانو کہ غیر کانودی ہِن و بر ءِ توننگ مرے۔ مندشار و ”ریدپک“ سیم سر نا نیام اٹی سڑک نا راستیکو پارہ غا مش اٹ گڑاس اُرا تفنگانے، او علاقہ خلق ءِ، ہرا داخس بھاز زیبدار ءِ کہ بیان آن پیشن ءِ۔ اوفتا اُراتا تفنگ اسُل جتاءِ۔ مچ آ بلوچستان اٹی دا وڑ انا اُرا نم خنپرورے۔ دا علاقہ نا خاص انگا ہیت دادے کہ اُرا تا پیشن نا دیوال آک افس۔

مند تحصیل آن بیدس بلیدہ و زامران تون ہم ایران نا سیم سر لگک۔ سیم سر آ مخلوق ہڑتوم آ پارہ غان سانگ بندی کرینو ہرا کہ پوسکن ءُ ہیت اس تو اف ولے مخلوق ہڑتوم آ جاگہ غاتا مزہ غاتے ہلیک۔ و بھاز آ فائدہ غاتے دوئی کیک۔

دا قطبی تحصیل آتیان بیدس تربت نا دے ٹک اٹی 100 کلو میٹر نا مُری آ ہوشاب نا علاقہ ءِ، ہرا اونا خاص انگا و بھلا آبادی ءِ۔ وخت اس کہ تربت نا سویل اٹی بھلو مرغن ءُ میدان اسے، ہرا تحصیل دشت ءِ۔ ہرانا بندغ آک تینا پن اتون فخر اٹ دشتی نوشتہ کیرہ۔ ڈاکٹر شاہ محمد مری تیناکتاب ”سورج کا شہر“ اٹی دشتی تا بارو اٹ نوشتہ کیک ”دشتی بے گوئشتی“…… (دشتی ضدی)۔

دا تو سب تحصیل آتا ذکر مس، ولے ضلع کیچ اٹی سد آ زیبدار آ خلق آک اریر، ہر اسہ خلق انا تینا اسہ زیبداری اسے۔ پکا انگا سڑک، نالی، کنوئی دیر، گیس انا آسراتی، اسٹریٹ لائٹ، ہسپتال و گچین آ اسکول دا آسراتیک اف آن حساب ءُ۔ ولے دا کل انا مفننگ آن پد ہم مخلوق اللہ رب العزت نامنت واری اٹ تینا زند ءِ گدریفنگ اٹی ءِ۔

دا مچ آ ندارہ غاتا مسخت دا ئس کہ نمے پان کہ دا مچ آ مُر خڑک انا تحصیل آک شار تربت آن سیبو ہلیرہ۔ شاری آسراتی، واپار، تعلیم، دارو درمان و شرحالی مچے بھاز ارے تو تربت شار اٹی اریر۔ ہندا سوب آن دا علاقہ غاتا مخلوق تربت آ بننگ اٹی ءِ۔

(برجا ءِ)

ہفتئی تلار
تاک:41
۔13-19 نومبر 2021ء
پنہ: 02