پوسکن آ سال

نزیری

0

Get real time updates directly on you device, subscribe now.

 

سفر جان، ول اس دانگ ہلیک ول اس اینگ، ہندُن بے قرار ءِ کس پاہے تُوبے نا پارہ غا تینا خلائی آ جہاز اکن انتظار کنِنگ ءِ۔

وار اس کاہک آدینک نا پارہ غا اِرس ءِ ہرفک، پیشکو آتے ارس کیک۔۔۔۔۔۔ وار اس بروت آتے ہندُن تاب ایتک کہ اسُل اوڑان اینگ پشہ کُنے تے۔

تاتہ تے ناز خاتون اسہ وارآ ٹاکو اس خلک پارے او مار ”سفو“! نی انتئے اسہ جاگہ غا تُولپیسہ۔۔۔۔۔ ڈغار کنیک نے انت؟

اسہ پاس اس مریک کہ نی وار اس آدینک آ مون کیسہ وار اس دانگ کاسہ وار اس اینگ، انت اسے نا خیالی اُس۔

سفر جان ہندُن بروت آتے تاب تِرسا مون ءِ ہڑسا، ہنداخس زور آن ہیت ءِ تینا کرے، کس پائے بِنوک آک ہلمند اٹی ءُ…… تاتی نے سما اف…… اینو سال پوسکُن مریک……

یانزدہ و نیم بجہ مننگ ءِ۔۔۔۔۔۔۔ پورا دوانزدہ بجہ غا پوسکُن آ سال اَنا بِنا مریک۔۔۔۔۔۔ 2022ء

ای سال انا خوشی آن تُوفک ءِ ٹکا ایتوہ، منہ سُم اس خلیوہ، پین انت اسے نا خیالی مروٹ……؟

تاتی نازخاتون ہندُن شیرزالی آ رعُب آن چُلک ہلوک آ خن تے چریفے ایا تے پارے مڷ…… دا بدحالی نا سال تے کِن تُوفک خلیرے!۔۔۔۔۔۔۔ ہراکہ اسل پوسکُن تو مریرہ ولے مُتکُن آ بدحالیک ولدا ہمودو، لنگڑی ہمو، بیوسی ہمو، ہمو زندانک داسکان آباد ءُ، نما کوپہ و خواجہ غاتیان…… ہمو قتل و کوش آک، ہمو ایڑو تا سڑک آتیا چِرکاو و کوکار۔…… ہمو بے ایمان آ عدالت آک۔ انت سال انا خوشی اس کروس، مے انا انت گل و بالی اسے؟

مے ہم وخت اس سال آتا بدل منِنگ کِن خوشی کنِنگ کیک؟

مے انا عئید آک ہم نن کِن عئید افس مار، نی پاسہ سال اکن تُوفک خلیوہ، دا سُم ءِ تینا ڈیہہ و ڈغار نا رکھ اکِن ڈکہ۔ دا سُم ءِ سال انا خوشی ٹی زیان کپّہ۔ دا ہم ہمو سال ءِ ہرا گدرینگا…… نی ہندُن ءُ سال اسے کِن خوشی کر ہرادے نا و قوم انا بدحالی ایسر مرے، ہرازدے کہ نی تینا فیصلہ غاتا، کارو کڑد انا خواجہ مسس، گُڑا او سال اکِن ای ہم نے تون اوار خوشی کروٹ……

تاکہ شعور بش ہلتَنے…… بدحالی چٹتنے۔ کنا مڷو۔ و دا کل اکِن شعور اس دوئی کروئی ءِ۔ قوم اس مروئی ءِ۔ گواچنی ءُ قوم اس مروئی ءِ، قلم و کتاب تون دولخی کروئی ءِ۔ گُڑا نما سال آک ہتم مرور، وسم مرور۔ و دا حالیت سم تا زیان ہم کڑزو ءِ۔

ہفتئی تلار
تاک:02
۔14-08جنوری 2022ء۔
پنہ: 06

Get real time updates directly on you device, subscribe now.

Leave A Reply

Your email address will not be published.