شہزاد نذیر (برج دلو)

شہزادنذیر نا ودی دے (6 فروری 1972ء) برج ”دلو“ (Acquarus)، (برج انا ودشت ”21جنوری آن 19 فروری اِسکان)، حساب اٹی ”یانزدہ میکوبرج“، استا ر”زحل“ (Saturn)، دروشم ”خوابڈ“، تب ”بادی“، ہجی نا حرف آک ”س، ش، ص، ث“، ہندا تب انا ایلو برج آک ”جوزا، میزان“، تب آن چَپ برج آک ”ثور، اسد، عقرب“، اسہ وڑ انا برج آک ”حمل، جدی، قوس، حوت“، بے تعلق برج آک ”سنبلہ، سرطان“، کلید وجود ”پٹ پول، مہر، خذمت“ جم وڑ اٹ تب انا اثر ”ذہین، قلم کار اسے تو لوز آتتون گوازی کروک، ذوق جمالیات“، ودی دے ئی عدد ”6“، مرکب عدد ”47“، لائف پاتھ ”9“، فطری گچین کاری نا اثر ”ذہنی و جذباتی“ ءِ۔

شہزاد نذیر نا برج (دلو) نا رد اٹ بندغی نا خیرخواہ، جوان ءُ آخبت اسے کن مدام کوشست کروک، حوصلہ مند، ہمتی، مستقل مزاج، خود اعتماد، مستین آ سجفوک، تینا زند ءِ بدلیفنگ نا خواہندار، امن پسند، زمواری تے پورو کروک، مخالف جنس ءِ متاثر کروک۔ دوستی ٹی اسہ آب اس ٹہیفنگ، دوستی ٹی روحانی ءُ تسکین اسے نا خواہندار، ہر وڑ اٹ قدردان و ایلوفتا جوزہ غاتے قدر تننگ اونا وصف آتے ٹی ساڑی ءِ۔ اسہ کنڈ آ تینا ذہانت نا سوب آن مخالف جنس انا اُست آ اثر شاغک، آجوئی پسندی تون اوار چندی جوانی تا خواجہ مننگ، تو ایلو کنڈ آ بھاز اِنگا جوانی تتون اوار گڑاس نزوری ہم ارے۔ دُن کہ زو گیرام کننگ، اسہ وخت اٹی کیہی محبت آتا قیدی مننگ کیک، دائے۔

شہزاد نذیر (ودی دے 6، فروری 1972) نا ودی دے ئی عدد ”6“ ءِ۔ علم الاعداد نا چاہوک آتا رد اٹ دا عدد شاندار شخصیت نا مالک ءِ۔ دعوت، راجی معاملہ غاتے ٹی شاہ خرچ مریک۔ فنون لطیفہ، محبت و سیکس انا نمائندگی ءِ کیک۔ مخالف جنس آجوان ءُ رعب اس شاغک۔ داعدد کاروبار، شریکی ٹی ہم جوان و بھروسہ کڑزوک ءِ۔ واہم دا عدد نا بندغ آک بھاز وخت نفرت نا سوب ہم مننگ کیرہ۔ علم الاعداد نا چاہوک آتا رد اٹ ودی دے ئی عدد ”6“ والا بندغ کن ودی دے ئی عدد ”4“ و ودی دے ئی عدد ”8“ جوان ءُ۔ ولے اوڑکن ہرا کہ مرے تُو انا 4، 8،13، 22، 26 و 31 تاریخ تیا ودی مروک آ بندغ آتا سنگتی آن مُر مننگ جوان ءِ۔

شہزادنذیرنا لائف پاتھ عدد ”9“ ءِ:

(6+2+1+9+7+2=27 –2+7=9)

دا لائف پاتھ عدد انسان دوست ءُ عدد اسے۔ داڑکن پنت و شون ہمدردی ہیل کننگے۔ دا عدد نا خواجہ تخلیق کاری ٹی سرسہبی دوئی کننگ کیک۔ دانا کلیدی حرف آک ہمدردی، انسان دوست، رومانٹک، ڈرامائی، تخلیق کار، مقناطیسی کشش ءُ۔ دا عدد والا تے کن ہر وڑ انا گیگ آک ساڑی ءُ۔ دا سوب آن کہ عدد ”9“ مچ آ عدد آتے تینا تہٹی ڈکوک تخوک ءِ۔ دا زندگانی ءِ ہر انسان کن آسان جوڑ کیک۔دا عدد نا منفی پہلو دادے کہ بے صبر مریک۔ کردار آتا چاہنگ اٹی نزور ءِ، ہندا سوب آن مخلوق اودے تینا مسخت آتے کن کاریم اٹ اتنگ کیک۔ عدد نا چاہوک آتا پاننگ ءِ کہ اردو نا پنی آ شاعر فیض احمد فیض، پنی آ شعر پاروک نصرت فتح علی خان نا لائف پاتھ عدد ہم ”9“ ئس۔

براہوئی زبان نا ایلو شاعر ادیب آتے ٹی پروفیسر عبدالواحد مینگل (ودی دے20 اپریل 1948ء)، پروفیسر گل بنگلزئی نا (ودی دے 2اگست 1935ء) پروفیسر خدا داد گل (ودی دے 8 جون 1956ء) احمد نعیم (ودی دے 10 مارچ 1985ء) اس تا لائف پاتھ عدد ہم ”9“ ءِ۔

نذیر شہزاد نا مرکب عدد ”47“ ءِ۔

(Shehzad 3+5+5+5+7+1+4=30– Nazir 5+1+7+1+2=17 –30+17=47)

دا عدد نا ارتعاش ہمودے ہرا عدد ”29“ نا ءِ۔ علم الاعداد نا چاہوک آتا رد اٹ عدد ”29“ اسہ غیر موافق ءُ عدد اسے۔ بے باور حالیت ودی کیک۔ ایلوفتتون درو نا سوب ہم مننگ کیک۔

شہزاد نذیر نا فطری گچین کاری نا اثر ”ذہنی و جذباتی“ ءِ۔ اونا ”ذہنی“ اثر نا خانہ ٹی ”H,H,A,N,A“، ”جذباتی“ گچین کاری نا خانہ ٹی ”S,Z,Z,I,R“، ”جسمانی“ گچین کاری نا خانہ ٹی ”E,D“ و وجدانی گچین کاری نا خانہ خالی ءِ۔ اونا ذہنی و جذباتی گچین کاری نا خانہ غاتے ٹی پنچ پنچ لوز ءُ۔ ہندا سوب آن دا ہڑتوم آ خانہ غاک بریبر ءُ۔ تو اونا فطری گچین کاری نا اثر ”ذہنی و جذباتی“ ءِ۔ ذہنی اثر والا بندغ آک ہر کاریم اٹی تینا سوچ و سمجھ ءِ کاریم اٹ اتیرہ، ہچ ءُ وڑ اسے ٹی جذباتی فیصلہ کپسہ۔ ہندا وڑ اٹ جذباتی اثر والا بندغ آک تینا خواہنداری ءِ مون آ تخسا تینا زندگانی نا فیصلہ غاتے کیرہ، جذباتی اثر نا فطری گچین کاری ٹی فنکارانہ آگہی ساڑی ءِ۔

ہفتئی تلار
تاک:02
۔14-08جنوری 2022ء
پنہ: 06