پرائیویٹ تعلیمی ادارہ غاک بیرہ کاروبار نا نیت کپس، گورنر بلوچستان

کوئٹہ (اے پی پی) گورنر بلوچستان امان اللہ خان یاسین زئی پارینے کہ پرائیویٹ اسکول و کالج آتا مالک آتے تینا نجی تعلیمی ادارہ غاتے بیرہ کاروبار نا نیت اٹ آخا بلکن راج انا جہالت و گمراہی نا تہاری تا چٹفنگ کن اجتماعی شعور تالان کننگ نا وڑا چلیفوئی مریک، دارداٹ تعلیم ءِ مون آ دننگ، فیس تیٹی ودکی کننگ آن مست لمہ و باوہ ءِ پت اٹ ہلنگ، جان جوڑ تعلیمی ماحول ءِ پک کننگ، تینا استاد آتے جوان و وخت آ معاوضہ تننگ نجی تعلیمی ادارہ غاتا مالک آتا اولی زمواری تیٹی اوار ءِ۔ داخیال آتا درشانی ءِ او جمعہ نادے آ گورنر ہاﺅس کوئٹہ ٹی مسکوہی باسک صوبائی اسمبلی ڈاکٹر اسحاق بلوچ و نوابزادہ ریاض نوشیروانی نا کماشی ٹی والدین فورم نا اسہ ڈل اسے تون گپ وتران کرسا کرے۔ ڈل اتون گپ وتران کرسا گورنر بلوچستان پارے کہ جان ہلوک آ کوروناوائرس ودی مروک آ حالیت آتا تعلیمی ادارہ غاتیا منفی زہم تمانے، چناتا تعلیمی نسخان تون اوار اوار نجی تعلیمی ادارہ غاتا نیزگار استاد و مالک آک مشکل آتیٹی تموک ءُ۔ گورنر یاسین زئی پارے کہ داغٹ انا نئے بیرہ ننے جوان احساس ارے بلکن ساڑی حکومت مچ آ صوبہ ٹی بھاز زوت تعلیمی چرجوئی تے پبی وڑاٹ بحال کرفنگ کن سنبرینگوک ہم ارے۔ گورنریاسین زئی پارے کہ تعلیم نا اصل مسخت کڑد سازی و شعور نا پکا کننگ ءِ۔ داڑتون اوار اوار تعلیم قربانی، بردباری و بشر سنگتی ہیل ایتک گورنر یاسین زئی والدین فورم نا کنڈآن تالان کروک ویل آتا ایسری کن تینا ہروڑ کمک نا باوری کرفے وپارے کہ دا چرجوئی ٹی غٹ سرکاری و غیر سرکاری زموار بندغ آتون ہم ہیت کننگک تانکہ مون تروک مشکل آتا دمدستی وڑاٹ چٹفنگ ممکن مننگ کے۔