پٹرول 15 روپئی اڑزان، مزور تپہ کن 200 ارب روپئی نا پیکیج

اسلام آباد(اے پی پی) وزیراعظم عمران خان کوروناوائرس نا زہم آتا رداٹ زرگزرانی پیکیج نا پڑوءِ کرسا پارینے کہ مزور تپہ کن 200ارب روپئی، راج انا بے کچ نیزگار تپہ کن 150ارب روپئی، برآمد کنندگان آتے دمدستی 100ارب روپئی ریفنڈ کننگ، چنکا، بھلا، صنعت و کشت وکشار کن 100ارب روپئی، یوٹیلیٹی اسٹور آتے کن پین 501ارب روپئی ، لاک ڈاو ¿ن تون مون تننگ کن 100ارب روپئی وسرکاری خولم ہلنگ کن 280ارب روپئی جتا کننگانے۔ ہر خاہوت ءِ چار تُو اسکان تُو انا مسہ ہزار روپئی کمک تننگک، 300یونٹ اسکان بجلی و گیس انا بل مسہ تُو انا قسط آتے ٹی ہلنگک، پٹرولیم مصنوعات آتیا خراج 15روپئی کم کننگ اُن، دال آتون اوار ضروری آ گڑاتیا خراج آتا کچ ءِ کم کننگ اُن، تعمیراتی صںعت کن خصوصی مراعاتی پیکیج اس تیار کننگ اُن، میڈیا ورکرز آتے کن ہم خصوصی پیکیج اس تیار کننگ نا پارت کرینٹ۔ داخیال آتا درشانی ءِ او سے شنبے نادے آ سینئر صحافی تتون گپ وتران کرسا کرے۔ داوخت آ بنجائی وزیر رکھ خور و پٹ وپول خسروبختیار، وزیراعظم نا سلاہکار خزانہ عبدالحفیظ شیخ ، وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان ، وزیراعظم نا خصوصی کمکار جان جوڑی ڈاکٹر ظفر مرزا، وزیراعظم نا خصوصی کمکار پٹرولیم ندیم بابر و این ڈی ایم اے نا چیئرمین لیفٹیننٹ جنرل محمد افضل ئسک ہم ساڑی ئسر۔ وزیراعظم عمران خان پارے کہ ننے غٹ آن بھلا خطرہ کورونا غان آخا غلط فیصلہ غاتیان مننگ کیک، ہراتم ملک اٹی کورونانا 21کیس ئسر ہمووخت آ اسکول وایلو ادارہ غاتے بند کریسن، لاک ڈاو ¿ن نا رداٹ اسکول و السی ہندآک مہالوآن بند ءُ۔ اوپارے کہ نن مچ آ ملک اٹی کرفیو نا متحمل مننگ کپنہ، کرفیو نا ہزگار تپہ غا زہم تمپک ولے نیزگار خلقت داڑآن زہمی مریک، پورو لاک ڈاو ¿ن کننگ آن کچہ انگا آبادی، دیہاڑی دار مزور آتے خور دیر فراوان کیک، کرفیو لاک ڈاو ¿ن نا آخیریکو ایسر ءِ و مچ آ ٹیم حالیت آتا ہڑدے جاچ ءِ ہلنگ ءُ۔ اوپارے کہ بدبختی اٹ مستین اٹی بیرہ طاقتور تپہ نا فائدہ غاتا رداٹ فیصلہ مرسا کرے، راج انا مراعات یافتہ تپہ کن نجی ہسپتال جوڑ مس، الس کن بیرہ سرکاری ہسپتال آک سلیسر، وزیراعظم پارے کہ مزور تپہ کن 200ارب روپئی جتا کننگ اُن ، برآمد کنندگان آتے کن دمدستی 100ارب روپئی نا خراج ریفنڈ جاری کننگک، برآمد کنندگان آتا وام تیا سود ءِ ملتوی کننگک۔ اوپارے کہ چنکا ، بھلا صنعت وکشت وکشار کن 100ارب روپئی تخانن ، چنکا صنعت و کشت وکشار کن آسان شڑت آتیا وام فراوان کننگک، راج انا بے کچ نیزگار تپہ کن 150ارب روپئی جتا کننگانے، ہر خاہوت ءِ چار تُو ماہانہ سی ہزار روپئی امداد تننگک۔ اوپارے کہ مفت لنگر و پناہ گاہ تا کچ اٹی پین ودکی کننگک۔ اوپارے کہ یوٹیلیٹی اسٹور تیکن پین 50ارب روپئی جتا کننگانے، خولم نا سرکاری ہلنگ کن 280ارب روپئی جتا کننگانے، پٹرولیم مصنوعات آتیا خراج 15روپئی کم کننگ اُن ،300یونٹ اسکان بجلی و گیس انا بل مسہ تُو انا قسط آتے ٹی ہلنگک، دال آتون اوار ضروری آ گڑاتیا خراج نا کچ ءِ کم کننگ اُن ، لاک ڈاو ¿ن نا زہم اتون مون تننگ کن 100ارب روپئی جتا کننگانے۔ اوپارے کہ تعمیراتی صںعت کن خصوصی مراعاتی پیکیج اس تیار کننگ اُن ہرانا پڑوءِ زوت کننگک۔ اوپارے کہ چین آن پاکستانی طالب علم آتا پدی اتنگ نا فیصلہ ءِ جوزہ غاتا جاگہ غا ملکی فائدہ غاتے ٹی کرین، وخت پاکستان نا طالب علم آتا بابت ننا فیصلہ ءِ سہی پک کرے، ایران پابندی تا سوب کوروناوائرس نا برخلاف گچین گام گیج کننگ اٹ بے سہب مس، زائر آتے تفتان اٹ تخنگ کن بست وبند کننگا۔ اوپارے کہ کورونا دین تالان مننگ آن پد حکومت ترندی اٹ گام گیج آتا بناءِ کرے، ننے ہڑدڑنا جاگہ غا دوررس و پامدارانہ فیصلہ کروئی مریک، ہڑدے ئی بنداو آ دین انا زہم آتا جاچ ءِ ہلنگ اُن۔ اوپارے کہ اُراتیا اِرغ سرکننگ کن رضاکار آتا فورس اس جوڑ کروئی تمک،اللہ آن دعاءِ کہ ننے وخت اس ہم کرفیوءِ خلوئی تمپ۔ اوپارے کہ غٹ ادارہ غاتون اوار قوم انا ہر بندغ کورونا دین اتون اواری اٹ مون تروئی ءِ۔ اسہ سوج اسے نا ورندی ٹی وزیراعظم پارے کہ میڈیا ورکرز آتے کن ہم خصوصی پیکیج اس تیار کننگ نا پارت کرینن۔