ڈاکٹر خالد قمبرانی نا بے نظیر بھٹو شہید ہسپتال کوئٹہ نا آئیسولیشن وارڈ وکنٹرول روم نا جاچ

کوئٹہ(اے پی پی) صوبائی ڈائریکٹر ویکٹر بورن ڈیزیز ڈاکٹر خالد قمبرانی بے نظیر بھٹو شہید ہسپتال کوئٹہ ٹی کوروناوائرس نا مریض آتے کن جوڑ کروک آ آئیسولیشن وارڈ وکنٹرول روم انا معائنہ ءِ کرے و ہسپتال اٹی ساڑی عملہ ءِ کوروناوائرس آن بچفنگ و درمان نابارواٹی پارت تس۔ داوخت آ بے نظیر بھٹو شہید ہسپتال نا ایم ایس ڈاکٹر نور قاضی ڈاکٹر خالد قمبرانی ءِ ہسپتال اٹی کوروناوائرس نا مریض آتے کن جوڑ کروک آ آئیسولیشن وارڈ و مریض آتے تروک آ آسراتی تا بابت سرجم وڑاٹ معلومدار کرے اوپارے کہ ہسپتال اٹی کوروناوائرس نا بابت جوڑ کروک آ معلوماتی و کنٹرول روم بیست و چارگھنٹہ فعال ءِ۔ داوخت آ صوبائی کوآرڈینیٹر ایل ایچ ڈبلیو پروگرام ڈاکٹر کامران کاسی و صوبائی کوارڈنیٹر ایم سی ایچ ڈاکٹر سلطان لہڑی ئسک ہم ساڑی ئسر۔ صوبائی ڈائریکٹر ویکٹر بورن ڈیزیز ڈاکٹر خالد قمبرانی ہیت وگپ کرسا پارے کہ او سیکرٹری جان جوڑی مدثر وحید ملک و ڈائریکٹر جنرل ہیلتھ بلوچستان ڈاکٹر فہیم خان نا پارت آ بے نظیر بھٹو شہید ہسپتال اٹی کوروناوائرس نا مریض آتے فراوان کروک آ آسراتی تا جاچ ءِ ہلنگ کن بسنے۔ اوپارے کہ کورونا وائرس آن بچنگ نا اسٹ انا ایسر رکھی گام گیج ءِ الس ءِ مرے کہ او کوروناوائرس آن رکھ مننگ کن تینا اُراتیٹی مریر و وار وار آ تینا دوتے سلر۔ اوپارے کہ صوبائی حکومت و محکمہ جان جوڑی صوبہ ٹی کوروناوائرس ءِ کنٹرول کننگ کن ہروڑنا گام گیج کرینے و محکمہ جان جوڑی نا عملہ الس نا خذمت کن دے و نن کوشست کننگ ءِ۔ ڈاکٹر خالد قمبرانی ہسپتال اٹی ساڑی عملہ ءِ کوروناوائرس آن بچفنگ و درمان نابارواٹی پارت کرے۔