کورونا وائرس نا برخلاف اواری اٹ جنگ کروئی مریک، یو این سیکرٹری جنرل

اقوام متحدہ(اے پی پی) اقوام متحدہ نا سیکرٹری جنرل انتونیوگوتریس کوروناوائرس نا دین انا سوب آن مچ آدنیا ٹی غٹ متحارف کڑدہ غاتیان جنگ بندی نا خواست کرسا پارینے کہ دشمنی ءِ پدپشت تخسا اواری اٹ کورونا وائرس نا برخلاف جنگ آ چکار کننگے ہراانسان تا جان تے بچفنگ نا اصل جنگ ءِ۔ اوتدوک آ دے جاری کروک آ تینا ویڈیو کلہو اٹی پارے کہ داوخت آ مچ آ دنیا ءِ کورونا وائرس کون آ اسہ ہی دشمن نا مون تروک ءِ، کورونا وائرس نا تعلق ہچ ءُ قوم، نسل یا مذہب اسے تون اف بلکن دا بیدس رنگ و نسل غٹ آ جلہو کیک۔ اوپارے کہ دنیا نا غٹ آن پسماندہ ڈیہہ تا زالبول ، چناو بے اُرا بندغ آتے کوروناوائرس آن غٹ آن زیات خطرہ مون تروک ءِ۔ جنگ آن زہمی ملک آتے ٹی جان جوڑی نا ہیبدار بست وبند آتاچیلنج مون تروک ءِ۔ اقوام متحدہ نا سیکرٹری جنرل پارے کہ متحارب کڑدہ غاک دشمنی، بے پتی و عدالت ءِ پد پشت تخسا فضائی و ایلو جلہو غاتے چٹفرانتئے کہ داوخت آ خلقت نا جان تے بچفنگ کن کمکی راہداری جوڑ کننگ بھاز المی ءِ۔