پاکستانی لیجنڈ گوازی گر ظہیر عباس آئی سی سی ہال آف فیم اٹ اوار

دبئی (مانیٹرنگ ڈیسک) پاکستان نا پنی آ گوازی گر ظہیر عباس ءِ آئی سی سی ہال آف فیم 2020ء ٹی اوار کننگانے۔ دا اعزاز ءِ دوئی کروک آ مچ آ دنیا نا 93 کرکٹر تے ٹی ظہیر عباس ہمو ششمیکو پاکستانی ءِ ہرادے دا اعزاز رسینگانے۔ تدوک آ دے آئی سی سی ہال آف فیم اٹ بشخ ہلوک آتیٹی ظہیر عباس آن بیدس جیکوس کالیس او لیسا تھالیکر ہم اوار ئسر۔ آئی سی سی ہال آف فیم نا ساڑی باسک آک او گچین آ صحافی تا ووٹنگ کمیٹی دا اعزاز کن ظہیر عباس ءِ گچین کریر۔ داکان مست حنیف محمد، عمران خان، جاوید میانداد او وسیم اکرم ءِ سال 2009ء وخت اس کہ وقار یونس ءِ سال 2013ء اٹ دا اعزاز کن گچین کننگاسُس۔ آئی سی سی نا ویب سائٹ آ اسہ ڈائریکٹ سیشن اسے ٹی ہندا کرکٹر تا اواری نا پڑو مس۔ ظہیر عباس تون آن لائن اونا اُرائی ثمینہ ہم ساڑی ئس، ہرادے کرکٹ کمینٹیٹر ایلن ویلش تینا ارغ نا سرسہبی نا زموار پن کرے۔ آئی سی سی ہال آف فیم اٹ انگلینڈ نا 28، آسٹریلیا نا 27، ویسٹ انڈیز نا 18، بھارت نا 6، سویلی افریقہ نا 4، نیوزی لینڈ نا 3 او سری لنکا نا ہم اسہ کرکٹر اس اوار ءِ۔ چیئرمین پی سی بی احسان مانی پارینے کہ دا پاکستان کن اعزاز او فخر انا ہیت اسے کہ کرکٹ نا جہانی تنظیم نا کنڈ آن ظہیر عباس نا گچین آ کیرئیر نا اعتراف او اونا ستا ءِ کننگا۔ اودے خوشی ءِ کہ او مچ آ دنیا ٹی رہنگوک آ پاکستان کرکٹ نا کروڑ آ شیدائی تا کنڈآن ظہیر عباس ءِ مبارکباد پیش کننگ اٹی ءُُُ۔