پاکستان و جرمنی نا واپار، زرکاری و توانائی کمکاری ءِ مون آ دننگ آ امنائی
Get real time updates directly on you device, subscribe now.
پیرس: و زیراعظم محمد شہباز شریف و جرمن چانسلر اولاف شولز ئسک ہڑتوم آ ملک آتا نیام اٹ واپار، زرکاری و توانائی تون اوار چندی بشخ آتیٹی کمکاری ءِ مون آ دننگ آ امنا کرینو۔ داامنائی سلاہ جمعہ نادے آ داڑے پوسکن آ جہانی مالیاتی معاہدہ نا بابت سروک دیوان نا وخت آ اوڑدہی ٹی مس۔ وزیراعظم آفس نا میڈیا ونگ آن جاری بیان نارداٹ وزیراعظم پاکستان نا نوکاپ زہمی تیکن امداد و 163 ملین یورو نا زرگزرانی کمکاری نا فراوانی آ جرمن حکومت نا منت واری ءِ ہرفے۔ وزیراعظم پارے کہ بے نظیر انکم سپورٹ پروگرام کن 27 ملین یورو نا ودکی زر نوکاپ زہمی تا کمک و خور انا فراوانی کن استعمال مس۔ اوپارے کہ جرمنی ناشونداری ءِ مدام اسہ مثال اسے نا وڑاٹ پیش کرینن، جرمنی ہراوڑاٹ خواری اٹ تینکن جاگہ اس جوڑ کرینے او پدتموک ملک آتیکن اسہ بھلو مثال اسے۔ ہڑتوم آ سرکڑدہ غاک پاکستان و جرمنی ٹی واپار، زرکاری، توانائی تون اوار چندی بشخ آتیٹی کمکاری ءِ ودفنگ آامنا کریر۔ جرمن چانسلر وزیراعظم شہباز شریف کن خیرخواہی نا جوزہ غاتا درشانی ءِ کرسا پارے کہ نیتون ملسا بھاز خوشی مسنے۔ اوپاکستان نا حکومت و الس کن نیک است خواہی نا درشانی ءِ ہم کرے۔
(اے پی پی)